Ўзбекистон Хитойнинг Zhifei Longcom Biopharmaceutical компанияси томонидан яратилган ЗФ 2001 вакцинасининг ҳаммуаллифи сифатида тан олинди. Бу ҳақда «Ўзбекистон 24» телеканали орқали маълум қилинди.

Фото: Инновацион ривожланиш вазирлиги матбуот хизмати

«Бугунги кунчага Ўзбекистонда 6,8 мингдан ортиқ одам биринчи доза билан, 2,8 мингдан ортиқ киши эса иккинчи доза билан эмланди. Вакцинация жараёнида сезиларли салбий таъсирлар кузатилмаган, вакцинанинг хавфсизлиги ва ишончлилиги тасдиқланган. Айни вақтда коронавирусга қарши иммунитетни шакллантириш учун зудлик билан Ўзбекистон аҳолисини оммавий эмлаш зарур», — дейди Zhifei Longcom Biopharmaceutical компаниясининг Ўзбекистондаги клиник синовлари бўйича вакили Динг Фан.

Унинг сўзларига кўра, ҳозирда Ўзбекистон ҳукумати ZF 2001 вакцинасидан фавқулодда фойдаланишга рухсат бериш борасида иш олиб бормоқда. Ушбу вакцинани синовдан ўтказишда Ўзбекистон Инновацион ривожланиш ва Соғлиқни сақлаш вазирликларининг фаол иштироки ҳамда уларнинг клиник тадқиқотларга қўшган ҳиссасини инобатга олиниб, Ўзбекистон вакцинанинг ҳаммуаллифи сифатида эътироф этилган.

«Биз янги вакциналар яратиш ва илмий-тадқиқот ишларини тижоратлаштириш бўйича Ўзбекистон билан ишлашни давом эттирамиз. Ўзбекистонга вакциналарни олиш борасида имтиёзлар тақдим этилади. Ўзбекистон ҳукуматидан вакцинани қўллаш бўйича фавқулодда рухсат олинганидан сўнг, вакцина мамлакат бўйлаб ZF-UZ-VAK 2001 номи остида тарқатилади», — дейди Динг Фан.

Хитой вакцинасининг Ўзбекистондаги клиник синовларининг дастлабки натижаларига кўра, 1-даражали салбий таъсирлар (аллергия, тана ҳароратининг кўтарилиши, бош оғриғи) 5 кишида ёки вакцина реципиентларининг 0,3 фоизида кузатилган.

Эслатиб ўтамиз, Президент Шавкат Мирзиёев давлат дастури бўйича йиғилишда аҳолини коронавирусга қарши эмлаш ишларини бошлаш зарурлигини таъкидлаганди. Санитария-эпидемиология хизмати Ўзбекистонда коронавирусга қарши эмлаш март ойининг биринчи ярмида бошланишини маълум қилди. Бунда биринчи навбатда коронавирус юқиш хавфи даражаси юқори бўлган шахслар эмланади ва у фақатгина ихтиёрийлик тамойили асосида амалга оширилади. Ўзбекистонда коронавирусга қарши курашиш тадбирлари ва вакцина учун 3 триллион сўм ажратиш режалаштирилган.