Бухоро вилоятида тақиқланган бўлишига қарамай, тун ярмида ёввойи қуён овлаган браконьерлар қўлга олинди. Бу ҳақда «Дарё»га вилоят Экология ва атроф-муҳитни муҳофаза қилиш бошқармаси ахборот хизмати раҳбари Жаҳонгир Наврўзов маълум қилди.
Таъкидланишича, 2021 йилнинг 12 февраль куни вилоят Экология ва атроф-муҳитни муҳофаза қилиш бошқармаси ҳамда Миллий гвардия вилоят бошқармаси ходимлари ҳамкорлигида браконьерликнинг олдини олиш мақсадида тунги назорат рейди ўтказилган.
12 февралдан 13 февралга ўтар кечаси, тунги соат 01:40 да Жондор туманидаги «Моҳончўл» ҳудудида бир нечта фуқаро автомашинада кучли ёритиш чироғи орқали ов қилиб юргани аниқланган. Миллий гвардия ходимлари томонидан товуш чиқарувчи мослама орқали «тўхташ» ишораси берилишига қарамай, браконьерлар ҳаракатни давом эттирган. Ҳаракатни давом эттириши натижасида браконьерларнинг автомашинаси қум барханга бориб урилган.
Қўлга олинган браконьерларнинг автомашинаси тегишли тартибда текширилганда, унда 2 дона ов милтиғи, 1 дона ёритиш чироғи, ов учун мўлжалланган ўқ-дорилар ҳамда 7 дона овланган ёввойи товушқон борлиги аниқланган.
«Ёввойи қуёнларнинг кўпайиш даври инобатга олиниб, ҳар йили август ойидан бошлаб, март—апрель ойига қадар овлаш ва тутиш белгиланган тартибда тақиқланган. Ундан ташқари, хавфсизлик нуқтаи назаридан ҳам туннинг қоронғу пайтида ов қилиш қатъий тақиқланган», — деди Жаҳонгир Наврўзов.
Айни пайтда қўлга олинган Жондор туманида яшовчи 4 нафар фуқаро — И.С., И.У., Ф.Қ., Р.Ш.нинг ҳуқуқбузарлик содир этгани бўйича тўпланган ҳужжатлар суд органига тақдим этилган.
Изоҳ (0)