Маникюр қилинган ва лак билан қопланган тирноқлар чиройли ва тартибли кўринади. Шунга қарамай, мустаҳкамлигига зарар етмаслиги ва мўртлашмаслиги учун узоқ вақт давомида гел-лак билан қопланган тирноқлар билан юриб бўлмайди.
Биринчи сабаб: хунук кўринади
Уч ҳафтада тирноқ 3-6 миллиметрга ўсади ва бу тартибсиз кўринади. Коррекция қилишга улгурмайдиган бўлсангиз, ўсганида унчалик билинмайдиган тирноқ рангидаги оч лакдан фойдаланиш тавсия қилинади.
Иккинчи сабаб: кўчишни бошлайди
Замонавий гел-лакларнинг туриш муддати 21 кунга мўлжалланган. Шундан кейин база ўз хусусиятини йўқота бошлайди ва кўчиш ҳолати кузатилади.
Учинчи сабаб: гигиенага тўғри келмайди
Ўсган тирноқ ичига кир, чанг ва бактериялар тўплана бошлайди. Тирноқ устидаги лак қоплама эса йиғилган кирларни кўриш имконини бермайди. Агар узоқ вақт давомида гел-лак билан юрадиган бўлсангиз, тирноқларни совун суртилган чўтка билан тозалаб туриш тавсия қилинади.
Тўртинчи сабаб: ёриқлар пайдо бўлади
Бу, айниқса, узун тирноқларга тааллуқли. Гел-лак тирноқлар учун оғирлик қилади. Ўсгани сари оғирлик маркази тирноқ учига қараб боради ва натижада дарз кетиш ва синиш ҳолатлари кузатилади.
Бешинчи сабаб: тирноқнинг ичига ўсиши ва қадоқ
Педикюрда гел-лакдан фойдаланиш оёқ бармоқларини зўриқтиради, уларнинг биомеханикасига салбий таъсир қилади. Бу эса деформация ва қадоқларга олиб келади. Гел-лак, айниқса, ёпиқ пойабзал киядиганлар тирноғига зарар етказади. Шу сабаб ҳам маникюр ва педикюр усталари оёқлар тирноғига гел-лакдан фойдаланмасликни, фақат ёз ва таътилда суртиш ҳамда тирноқлар узунлигини қисқартириб туришни тавсия қилади.
Изоҳ (0)