Макияж ёрдамида кўзларни катта кўрсатиш бўйича 8 тавсия

Косметик воситалардан тўғри фойдаланиб чиройли кўринишга эга бўлиш, кўзнинг катта ва нигоҳларнинг порлоқ кўринишига эришиш мумкин.

Кўз остидаги ҳалқалардан қутулинг

Толиққанликдан белги берадиган ҳалқалар кўзларни кичик ва касалдек кўрсатади. Шу сабаб ҳам кўз атрофига намлантирадиган патчи ва кремлардан фойдаланиш, кейин эса консилер суртиш тавсия қилинади. Консилерни тери рангидан очроғини танлаш ва бармоқ ёки спонч билан яхшилаб сингдиришга ҳаракат қилиш керак.

Киприклар устидан қалам билан урғу бериш

Кўзлар катта кўриниши учун подводка билан стрелка чизиш шарт эмас. Лайнер ёки қалам ёрдамида киприкларга урғу бериш орқали ҳам кутилган натижага эришса бўлади.

Киприк қайиргич ёрдамидан фойдаланинг

Қайрилган киприклар нигоҳни чиройли, кўзларни эса катта кўрсатади. Киприк қайиргичдан фойдаланиш, айниқса, киприклари тўғри бўлганлар учун яхши самара беради.

Туш суртинг

Киприкка туш суртилганидан кейин кўзлар аслидан анча катта кўринади. Чўткани киприкнинг илдизидан ташқарига томон ҳаракатлантириб суртинг. Киприклар ёпишиб қоладиган бўлса, чўткаси билан ажратинг, ортиқча қолдиқлар киприкка ёпишиб қолмаслигига эътибор қаратинг. Кундалик образ учун табиий кўрсатадиган жигарранг тушдан фойдаланиш тавсия қилинади.

Пастки қовоққа ёрқин рангли бўёқ билан урғу беринг

Кремли ёки оч пушти қалам билан кўзнинг пастки қовоғига (киприклар ўсадиган қаторга) урғу беринг. Бунинг натижасида кўзларингиз шаҳло ва катта кўринади.

Ҳайлайтердан фойдаланишни унутманг

Қош остига ҳамда кўзнинг ички бурчагига ҳайлайтер суртинг. Тери ранги оч бўлганларга оч крем рангдаги, буғдойранг тери эгаларига эса тилларанг ҳайлайтердан фойдаланиш тавсия қилинади.

Тўқ ва оч рангларни мосланг

Кўзни катта кўрсатиш учун турли ранглар умумлашмасидан фойдаланинг. Тўқ рангли тенни кўзнинг ташқи бурчагига, оч ранглисини эса марказга суртинг. Бўёқ тўпланиб қолмаслиги учун яхшилаб сингдиринг.

Қошнинг тартибли бўлишига эътибор қаратинг

Тартибсиз қошлар кўзнинг кичик кўринишига ҳам сабаб бўлади. Шу сабаб вақтида қошни тартибга келтиришни ёддан чиқармаслик керак. Макияж уйғун бўлиши учун терилган қошни қалам ёки тен билан бўяшни унутманг. Ёки рангсиз гел билан ҳам урғу берсангиз бўлади.