USM Telecom ва «МегаФон» Ўзбекистондаги ҳамкорлар билан биргаликда янги қўшма корхона — Digital Holding’ни ташкил этди. Унинг таркибидан Ucell компанияси ҳамда USM’нинг Ўзбекистондаги активлари — CRPT Turon ва ICS Holding Uzbekistan ўрин олди, деб хабар бермоқда Ucell матбуот хизмати.
Ўзбекистон ҳукумати Давлат активларини бошқариш агентлиги (ДАБА) орқали корхонага Ucell телеком-операторининг 100 фоиз улушини топширмоқда. Россия томони Digital Holding ривожланиши учун 100 миллион доллар инвестиция, шунингдек, USM’нинг шўъба корхоналари — CRPT Turon ва ICS Holding Uzbekistan’ни киритмоқда.
Янги корхонада «МегаФон» ва USM Telecom тенг улуш билан ташкил этган Digital Invest компаниясининг улуши 51 фоиз, ДАБА улуши 49 фоизга тенг. Битим доирасидаги жараёнлар 2021 йил давомида якунига етади.
«Digital Holding эътиборини Ўзбекистон Республикасида алоқа хизматларидан фойдаланишни янада қулайроқ қилиш ҳамда сифатини ошириш учун халқаро стандартларга мос келувчи телекоммуникация инфраструктурасини шакллантиришга, ахборот хавфсизлиги ва маълумотларни сақлаш, баъзи турдаги товарлар ҳаракатини маркировкалаш ва кузатиб бориш соҳаларидаги илғор технология ва тизимларни татбиқ этишга қаратади», — дейилади компания хабарида.
«Ўзбекистоннинг рақамли хизматлар бозорида етакчи иштирокчини яратиш ҳам ‘МегаФон’, ҳам МДҲ ва Шарқий Европа ҳудуди технологик лидерни барпо этаётган USM Telecom стратегияларига мос келади. Ишончимиз комилки, ‘МегаФон’, Салоҳиятли технологияларни ривожлантириш маркази ва ‘Икс Холдинг’нинг рақамли лойиҳаларни амалга оширишдаги кўп йиллик экспертизаси Ўзбекистондаги соҳанинг энг йирик иштирокчисини ривожлантиришга кўмаклашади», — деган USM Telecom бош директори Иван Стрешинский.
«Рақамли хизматлар истеъмоли нуқтаи назаридан, Ўзбекистон МДҲнинг энг салоҳиятли бозорларидан, у сўнгги 10 йил ичида мобил алоқа абонентларининг уч баравардан кўп ўсишини намойиш этган бўлса-да, ҳали-ҳануз тўйинишдан йироқ. Биз 2021−йил давомида Ucell ичида жиддий таркибий ўзгаришлар қилиш режасидан йироқмиз, кўпроқ жипслашиш ва Ucell’да бизнес ўсиши учун энг яхши амалиётларни татбиқ этишга эътиборимизни қаратамиз», — деган «МегаФон» бош директори Геворк Вермишян.
«Ишончим комил: янги қўшма корхонанинг ишга тушиши Ўзбекистоннинг сўнгги йилларда шиддат билан ривожланаётган рақамли хизматлар бозорига янги туртки бўлади ва Ucell ҳамда унинг абонентлари учун янги имкониятларни яратади», — деб таъкидлаган Ўзбекистон бош вазирининг маслаҳатчиси Олимжон Умаров.
USM Telecom — USM холдингининг рақамли бўлинмаси. «МегаФон» телеком оператори ва «Икс Холдинг» АТ гуруҳининг 100 фоизини назорат қилади. USM Telecom’нинг асосий мулкдорлари − USM (80 фоиз акциялар), Иван Стрешинский (10 фоиз) ва Антон Черепенников (10 фоиз).
«МегаФон» — Россиянинг телекоммуникация бозорида етакчи ўринларда турувчи рақамли имкониятлар миллий оператори. «МегаФон» Россия телеком бозорининг барча сегментларида, шу билан бирга Абхазия, Жанубий Осетия, ва Тожикистонда фаолият юритади, алоқа сифатига азалдан алоҳида эътибор қаратади ва абонентларига юқори тезликдаги интернет тақдим этади.
«ИКС Холдинг» — Россиянинг кўптармоқли АТ-гуруҳи, у YADRO, Nexign, «Ситадел», «Криптонит» ҳамда «Форпост» номли 5 та субхолдингга бирлашган 30 та компанияни ўз ичига олади. «Икс Холдинг» фаолиятининг устувор йўналишлари — йирик ишлаб чиқариш корхоналарини рақамли трансформациялаш, ахборот хавфсизлиги, маълумотларни сақлаш тизимлари, криптография ва квант ҳисоб-китоблар, машиналаштирилган таълим ва нейротармоқлар, блокчейн технологиялари ва сунъий интеллектдан иборат. Холдинг алоқа операторлари учун энг йирик АТ етказиб берувчи саналади ҳамда Россиянинг йирик АТ ишлаб чиқарувчилари топ учталигига киради.
Салоҳиятли технологияларни ривожлантириш маркази рақамли иқтисодиётдаги салмоқли лойиҳаларни амалга ошириш учун ташкил қилинган. Марказ USM (50 фоиз), Ростех давлат корпорацияси (25 фоиз) ва «Элвис-Плюс групп» (25 фоиз)нинг қўшма лойиҳасидир. Салоҳиятли технологияларни ривожлантириш маркази Россияда товарларни рақамли маркировкалаш ва кузатиб бориш давлат ахборот тизимини яратмоқда. Давлат-хусусий шериклик шаклида ташкил қилинган CRPT Turon эксперимент натижаларига кўра Ўзбекистонда товарларни рақамли маркировкалаш ва кузатиб бориш тизими оператори деб танланган.
Ucell — GSM, UMTS, LTE ва 5G стандартларидаги ўзбек уяли алоқа оператори. 2018 йилнинг 5 декабридан ООО «COSCOM» («Ucell» савдо белгиси) — 100 фоиз давлат компаниясидир. Ўтган икки йил мобайнида 8 миллион абонентга эга Ucell Ўзбекистон уяли алоқа бозорида етакчига айланди. 2020 йил февраль ҳолати бўйича аҳоли пунктларидаги қамрови 97,6 фоиз (GSM); 72,9 фоиз (UMTS); 60,8 фоиз (LTE)ни ташкил этмоқда. Ucell — Ўзбекистонда 5G стандарти бўйича илк оператор.
Эслатиб ўтамиз, Ўзбекистон Президентининг 2020 йил октябрь ойидаги «Давлат иштирокидаги корхоналарни ислоҳ қилишни жадаллаштириш ҳамда давлат активларини хусусийлаштиришга оид чора-тадбирлар тўғрисида»ги фармонида Mobiuz ва Perfectum босқичма-босқич хусусийлаштирилиши, Ucell эса оптималлаштирилиши белгиланганди.
Изоҳ (0)