Қашқадарёда абитуриентларга техникум ва университетга ўқишга кириб қўйишни ваъда қилиб, улардан жами 22,5 минг доллардан ортиқ пулларни фирибгарлик йўли билан қўлга киритган шахслар ушланди. Бу ҳақда Бош прокуратура «Дарё»га маълум қилди.
Маълум қилинишича, Бош прокуратура ҳузуридаги департаментнинг Шаҳрисабз шаҳар бўлими томонидан терговга қадар текширув ўтказилган. Текширув давомида фуқаро М.Ф. ва И.Ш. «Абу Али Ибн Сино» номидаги жамоат саломатлиги техникумига ўқишга киритиб қўйиш эвазига 21 нафар фуқаронинг 5000 АҚШ доллари ва 5,2 миллион сўмини қўлга киритгани аниқланган.
Шунингдек, фирибгарлар яна бир фуқарони Қарши давлат университетига ўқишга киритиш ва Тошкент шаҳридан уй олиб беришни ваъда қилиб, унинг 17,5 минг долларини қўлга киритгани маълум бўлди.
Мазкур ҳолат юзасидан М.Ф. ва И.Ш.га нисбатан Жиноят кодексининг 168-моддаси (фирибгарлик) 3-қисми ва 28,211-моддаси билан жиноят иши қўзғатилиб, тергов ҳаракатлари ўтказилмоқда.
Аввалроқ Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10 500 доллар пул олган аёл қўлга олинган эди.
