Қашқадарёда Жанубий Кореяга жўнатишини айтиб фуқаролардан 9500 доллар олган шахс ушланди

Қарши шаҳрида Жанубий Кореяга ишлашга жўнатишни ваъда қилиб, фуқаролардан жами 9500 АҚШ доллари олган шахс қўлга олинди, дея хабар бермоқда Тергов департаменти.

Таъкидланишича, 2017 йилнинг сентябрь ойидан 2018 йилнинг апрель ойигача бўлган вақт оралиғида фуқаро 54 ёшли Асқар Й. ўзганинг мулкини фирибгарлик йўли билан қўлга киритиш мақсадида Қарши шаҳар Эски бозор савдо мажмуасида танишлари Шоҳрух Д. ва Фарруҳ К.ларга Жанубий Корея давлатига ишга жўнатишини айтиб уларнинг ишончига кирган.

Шундан сўнг жами 9 500 АҚШ долларни алдов йўли билан олиб, берган ваъдасини бажармасдан, турли баҳоналар қилиб, олган пулларни ўз эҳтиёжи йўлида сарфлаб юборган.

Мазкур ҳолат юзасидан Қарши шаҳар ИИО ФМБ ҳузуридаги Тергов бўлими томонидан фуқаро Асқар Й.га нисбатан Жиноят кодексининг 168-моддаси 3-қисми «б» банди (фирибгарлик) билан жиноят иши қўзғатилган.

Ҳозирда тергов ҳаракатлари олиб борилмоқда.

Аввалроқ Тошкентда 14 нафар фуқарони Украинада алдаб ишлатиб, 17,5 минг доллар иш ҳақини бермай келган шахслар қўлга олингани, Бухорода Telegram’даги гуруҳга обуначи қўшганларга мукофот ваъда қилиб, сўнгра уларни чув туширган шахс қўлга олингани ҳамда Тошкентда Президент совға қилган хонадонга 10 минг доллар эвазига кадастр ҳужжати расмийлаштириб беришни ваъда қилган шахслар ушлангани ҳақида хабар берилганди.