Фарғона вилоятининг Бағдод, Ёзёвон ва Ўзбекистон тумани ҳокимлари ўзгарди. Бу ҳақда «Дарё» мухбири Азизжон Эрматов хабар берди.
Таъкидланишича, 6 февраль куни вилоят ҳокими Хайрулло Бозоров раҳбарлигида бўлиб ўтган халқ депутатлари Бағдод туман Кенгашининг навбатдан ташқари 21-сессиясида туман ҳокими вазифасини бажариб келган Алибек Турсунов бошқа ишга ўтиши муносабати билан лавозимидан озод этилган.
Айни вақтга қадар вилоят молия бошқармаси бошлиғи лавозимида фаолият юритган Восил Назаров Бағдод тумани ҳокими этиб тайинланган.
Шунингдек, бугун халқ депутатлари Ўзбекистон тумани Кенгашининг навбатдан ташқари сессияси бўлиб ўтган.
Сессияда ташкилий масала кўрилиб, шу кунга қадар Фарғона шаҳар ҳокимининг иқтисодиёт ва тадбиркорлик масалалари бўйича ўринбосари вазифасида ишлаб келган Шерзод Йўлдошев Ўзбекистон тумани ҳокими лавозимига тасдиқланган.
Фарғона вилояти ҳокими Хайрулло Бозоров Ёзёвон туман Кенгашининг навбатдан ташқари сессиясида ҳам иштирок этиб, Дилшод Жалиловни туман ҳокими сифатида таништирган.
Дилшод Жалилов 1980 йилда Фарғона шаҳрида туғилган бўлиб, 2001 йилда Фарғона политехника институтини тамомлаган. 2002—2015 йилларда «Фарғона ҳудудий электр тармоқлари корхонаси»да турли лавозимларда ишлаган. 2016 йил 16 май кунидан «Фарғона ҳудудий электр тармоқлари корхонаси» АЖ бош директори лавозимида фаолият юритган.
2021 йил 5 февраль куни Президент Шавкат Мирзиёев иштирокида бўлиб ўтган халқ депутатлари Фарғона вилояти Кенгашининг навбатдан ташқари сессиясида Ўзбекистон тумани ҳокими вазифасида ишлаб келаётган Қаҳрамон Жўраев ҳамда туман прокурори Мирвоҳид Отабоев лавозимидан озод қилингани тўғрисида хабар берилганди.
Изоҳ (0)