Бухородаги бозор маъмурияти Bukhara News ходимлари ишига тўсқинлик қилди (видео)

Бухоро марказий бозори маъмурияти 6 февраль куни Bukhara News интернет-нашри ходимлари ишига тўсқинлик қилгани ҳақида хабар берилди.

Таъкидланишича, бозор вакиллари ходимларга у ерда социологик сўров ўтказишни тақиқлаб, журналистдан микрофон ва телефонни олиб қўйган. Нашр томонидан тарқатилган видеолавҳада тасвирланган шахс журналист ва оператор билан тортишиб, рухсатнома талаб қилган, ўзи эса шахсини тасдиқлашдан бош тортган.

Хабар эълон қилингандан сўнг содир бўлган воқеага Ахборот ва оммавий коммуникациялар агентлиги муносабат билдирди.

«АОКА ўз ваколатлари доирасида ушбу ҳолатни ўрганиб чиқди ва томонларнинг ҳаракатларига ҳуқуқий баҳо бериш учун Ички ишлар вазирлиги, Бош прокуратура ва Бухоро вилоят ҳокимлигига мурожаат қилди», дейилади агентлик баёнотида.

«Gazeta.uz»нинг хабар беришича, бозор маъмурияти ҳам воқеани кўриб чиқаётганини ва натижалари тўғрисида хабар беришини айтган.