Замонавий инсонлар ўз фарзандларига ажойиб ва антиқа исм танлашда давом этмоқда. Бироқ айрим мамлакатларда чақалоқларга исм қўйишда бир қанча чекловлар мавжуд. Ҳукумат ота-оналарнинг барча ижодий ғоялари рағбатлантирилиши керак эмас, деб ҳисоблайди.

Nutella ва Қулупнай  − Франция

Фото: AdMe

Француз оилалари қиз фарзандига Nutella деб исм беришни одатга айлантирган эди. Эҳтимол, ота-оналар фарзандини келажакда ҳам машҳур бўлишини истагандир. Аммо бундай бўлмади, Nutella исмли қизларни мактабда масхара қилиш кузатилганидан сўнг уларнинг исми Элла деб ўзгартирилган. Ушбу воқеа жамиятда кенг муҳокамага сабаб бўлиб, натижада ҳукумат болаларга Nutella исмини беришни расман тақиқлаган.

Яна бир оила фарзандига Fraise − Қулупнай деб исм бермоқчи бўлганида уларга ҳам рад жавоб берилган. Чунки айнан шу ном билан ўхшаш жаргон сўз мавжуд бўлиб, у жуда хунук эшитилар эди. Натижада чақалоқ Фраисине деб аталган.

Терминатор  − Мексика

Фото: AdMe

Бир вақтлар Мексикада ушбу исм жуда кенг тарқалган эди. Актёр Арнольд Шварценеггер ўйнаган фильм қаҳрамони шарафига кўплаб болалар Терминатор деб аталган. Шу сабабли маҳаллий ҳокимият Терминатор номини тақиқлашга қарор қилган.

Ikea− Швеция

Фото: AdMe

Швед мебель дўконлари тармоғи жуда машҳур. Ҳукумат ушбу исмни фарзандларга қўймасликка қарор қилди ва ундан фойдаланиш ноқулайлик келтириб чиқармаслиги учун тақиқловчи қонун чиқарди.

Camilla − Исландия

Фото: AdMe

Исландияда туғилган чақалоқларга исм беришнинг аниқ қоидаларини белгилайдиган ва тартибга соладиган махсус қўмита мавжуд. Масалан, маҳаллий алифбода «C» ҳарфи бўлмаганлиги учун Camilla деб исм қўйиш тақиқланади. Аммо худди шу исмни «К» ҳарфи билан қўйиш муаммо эмас.

Санта Клаус − Огайо (АҚШ)

Фото: AdMe

Огайо штатида яшовчи Роберт Уильям Хендли Янги йил байрамини жуда яхши кўрганидан ўзининг исмини Санта Роберт Клаус деб ўзгартирмоқчи бўлган. Бироқ маҳаллий ҳокимият бу каби исмдан фойдаланишни тақиқлаган. Эркак бу қарордан қониқмай, ишни кўриб чиқиш учун судга мурожаат қилган. Натижада исмини ўзгартиришга муваффақ бўлган.

Ялпиз ва тош  − Германия

Фото: AdMe

Германияда болаларга Pfefferminze − Ялпиз исмини беришни хоҳлаганларнинг сўрови бу кулги уйғотиши мумкинлиги туфайли рад этилган. Шунингдек, инглизчада Stone  −  Тош номини ҳам фарзандларга қўйиш тақиқланган. Чунки у исм эмас, жисм. Бола исми туфайли ҳам ўзлигини англай олмаслиги мумкин, деган фикр билдирилган.

Жума ва Блу − Италия

Фото: AdMe

Ҳафтанинг Жума каби гўзал ва севимли кунини Италияда ном сифатида ишлатиш тақиқланган. Италия суди Venerdi сўзини (Жума деб таржима қилинади) «уятли ва кулгили» тоифага оид деб қарор қилган ҳамда ундан фойдаланишга рухсат бермайди.

Шунингдек, маҳаллий ҳукумат 2018 йилда туғилган чақалоққа Блу деб исм қўйилишга ҳам қарши бўлган. Чунки танланган ранглар ҳам бола жинсига мос келиши керак. Блу итальянчада кўк деган маънони англатади.

Бироқ ушбу тақиқ бутун Италия бўйлаб амал қилмайди. Масалан, 2020 йилда Жанлука Вакка ва унинг севгилиси Шарон Фонсека қизига Блу Жеруселама исмини берган. Жуфтлик Болонияда яшайди ва у ерда Блу исми бола учун номақбул деб ҳисобланмайди.

Плуто − Дания

Фото: AdMe

Данияда ота-оналар фарзандлари учун расмий ҳукумат рўйхатидан ном танлаши мумкин. Уларда 7000 га яқин тасдиқланган исмлар бор. Рўйхатда бўлмаган исмни беришни истаганлар бунинг учун расмий рухсат олиши керак. Масалан, Плуто ва Маймун тақиқланган исмлар рўйхатига киритилган.

@ − Хитой

Фото: AdMe

Хитойлик жуфтликлардан бири фарзандига @ деб исм қўйишни хоҳлаган. Гап шундаки, кучукча белгиси хитой тилида талаффуз бўйича «уни севиш» деган ибора билан ўхшаш. Бироқ бунга ҳам рад жавоб берилган. Хитойда ном сифатида рамзлардан фойдаланиш тақиқланади.

Малика − Янги Зеландия

Фото: AdMe

Янги Зеландияда болаларни Малика деб аташ тақиқланади. Мамлакат ушбу номни расмий унвон бўлганлиги учун рад этган. Шунингдек, тақиқланган исмлар рўйхатига шаҳзода, қирол, қиролича, герсог, майор, епископ, жаноб, хоним ва барон каби унвонлар ҳам киритилган.