Фарғона вилояти ҳокими Хайрулло Бозоров ўзининг 8 та ўринбосари ва 5 та сектор раҳбари билан вилоятдаги ишсиз ёшларни банд қилиш бўйича тизимли равишда курашади. Бу ҳақда 27 январь куни Президент Шавкат Мирзиёев раислигида ўтказилган йиғилишда сўз юритилди, дея хабар бермоқда «Дарё» мухбири.

Давлат раҳбарининг таъкидлашича, Фарғона вилоятида 18 ёшдан 30 ёшгача бўлган 703 минг нафар ёшларнинг 81 минг нафари ишсиз бўлиб, 35 минг нафари хорижга чиқиб кетган. Ҳисобга олинмаган ишсиз йигит-қизлар сони 100 мингдан зиёд.

Фото: Президент матбуот хизмати

«Биргина Олтиариқдаги 43 минг нафар ёшлардан 3,2 минг нафари иш билан таъминланмаган. Уларнинг ярми ёки 1,5 минг нафари тадбиркорликка ва касб-ҳунар ўрганишга қизиқиш билдирган. Мисол учун, «Зилол» маҳалласидаги 52 гектар бўш ерни «оборот»га қайтариб, 211 нафар ёшларни иш билан таъминлаш мумкин.

Туман бўйича эса жорий йилда 300 гектар ерни фойдаланишга киритиб, узумчилик бўйича ёшлар кооперациясини ташкил қилиш орқали камида 1 минг нафар ёшларни иш билан таъминласа бўлади. Бунинг учун қудуқ қазиб, сув чиқаришга 1 миллиард сўм субсидия ажратиш кифоя», - деди Президент.

Шавкат Мирзиёевнинг қўшимча қилишича, агар ҳар бир сектор раҳбари ёшларнинг маҳаллабай балансини чиқариб, ишларга аниқ ҳисоб-китоб ва илм билан ёндашса, албатта, натижага эришади.

Аввалроқ Шавкат Мирзиёев Ўзбекистондаги 18-30 ёшлилар орасидаги расмий ишсизлар сонини маълум қилган эди.