Қирғизистон президентлигига собиқ номзод, Давлат миллий хавфсизлик қўмитасининг собиқ раҳбари Абдил Сегизбаев ҳибсга олинди. Бу ҳақда «Tengrinews.кз» хабар берган.
Абдил Сегизбаев
Фото: «Tengrinews.кз»
Собиқ амалдор Юқори Кенгаш депутатларига босим ўтказиш ва уларни обрўсизлантиришда айбланмоқда.
Қирғизистон Бош прокуратураси берган маълумотларга кўра, 2021 йил 14 январда Юқори Кенгаш собиқ депутати Алмамбет Шимаматов идорага шундай мазмундаги ариза билан мурожаат қилган.
«Келиб тушган мурожаат асосида Қирғиз Республикасининг Жиноят кодекси 230-моддасига асосан (лавозим ҳолатини суиистеъмол қилиш) судга қадар суриштирув иши рўйхатга олинган. Ноқонуний хатти-ҳаракатлар ва Юқори Кенгашнинг депутатларини, хусусан, Алмамбет Шикмаматов, Аида Салянова ва Омурбек Текебаевни халқ олдида дискредитация қилиш (обрўсизлантириш), уларни жиноят қилганликда айблаш ҳолати бўйича иш очилган», – дейилади Бош прокуратура баёнотида.
Хабарларга кўра Сегизбаев Бишкек Ички ишлар бош бошқармасининг изоляторига жойлаштирилган.
«Қирғизистон ҳарбий прокуратураси ва давлат миллий хавфсизлик қўмитасининг судга қадар тергов-суриштируви давомида Абдил Сегизбаевнинг ушбу ҳаракатларни содир этгани аниқланган ҳамда у Қирғизистон Жиноят-процессуал кодексининг 98-моддаси тартибида ҳибсга олинган», – дейилади мамлакат Бош прокуратурасининг хабарида.
Айни вақтда мазкур жиноий хатти-ҳаракатларга алоқадор ёки унда иштирок этгани гумонланаётган бошқа шахсларни аниқлаш бўйича тергов-суриштирув ишлари олиб борилмоқда.
Аввал Қирғизистон Бош прокуратураси Сегизбоевга жиноят иши очган ва уни ерларни ноқонуний ўзлаштириш ҳамда уларда бинолар қуриш, шунингдек кейинчалик уларни қариндошлари номига ўтказиш билан шуғулланганини фош этганди.
