Toshkentda faoliyat olib borayotgan dorixonalardan biri o‘rnatilgan tartibda ko‘zdan kechirilganida, dorixonada fuqaro M.A. tomonidan retseptsiz tarzda 363 dona kapsulada kuchli ta’sir qiluvchi “Zardeks Gabapentin 300 mg” dori vositasi sotilayotgani aniqlandi. Bu haqda Davlat bojxona qo‘mitasi matbuot xizmati xabar berdi.
Shuningdek, dorixonadagi fuqaro M.Sh. ham o‘rnatilgan tartibda ko‘zdan kechirilgan va uning yonida 200 dona kapsulada “Zardeks Gabapentin 300 mg” dori vositasi borligi ma’lum bo‘lgan.
Davlat bojxona qo‘mitasi Kontrabandaga qarshi kurashish va bojxona auditi bosh boshqarmasi xodimlarining tezkor tadbiri davom ettirilib, fuqaro M.S.ning yashash xonadoni ham o‘rnatilgan tartibda ko‘zdan kechirilganida, xonadonda 76 dona kapsulada “Zardeks Gabapentin 300 mg” dori vositasi va gugurt qutisida 1 dona marixuana giyohvandlik vositasi borligi aniqlangan.
Shu tariqa jami 639 dona kapsulada kuchli ta’sir qiluvchi “Zardeks Gabapentin 300 mg” dori vositasi va 1 gramm marixuana giyohvandlik vositasi ashyoviy dalil sifatida olingan.
Hozirda holat yuzasidan bojxona organlari tomonidan tergovga qadar tekshiruv harakatlari davom ettirilmoqda.
Avvalroq Andijonda salkam 1,3 mlrd so‘mlik dori vositalari va tibbiy buyumlarning noqonuniy saqlanayotgani aniqlangani, Toshkentdagi xonadonlarning biridan 153 kilo soxta dori vositalari topilgani to‘g‘risida xabar berilgandi.
Izoh (0)