«Мамлакатда тўрт йилда 2 мингдан зиёд қарордан 600 тасининг ижроси бажарилмаган» – Шавкат Мирзиёев

Шавкат Мирзиёев раислигида қарорларни ижросини таъминлашга бағишланган йиғилиш ўтказилди. Унда қарор ва топшириқларнинг қуйи бўғингача тушунарли тарзда етиб бориши муҳокама қилинди.

«Кун тартибидаги масала – президент қарорларини, фармонларини жойларда қоғозда эмас, амалда тизимли равишда халққа етказиб бориш. Тўрт йилда кенг кўламли ислоҳотларни амалга ошириш бўйича 2 мингдан зиёд қарор қабул қилинди. Мана шу қарорларни мазмун моҳиятини айрим раҳбарлар, ўрта ва қуйи бўғин ходимлари тўлиқ тушунмаётгани оқибатида ҳозирги таҳлилларда 600 дан ортиқ топшириқ ижроси якунига етказилмаган.

Мисол учун, соғлиқни сақлаш, уй-жой коммунал хизмат кўрсатиш, олий таълим, транспорт, сув хўжалиги ва давлат мулкини бошқариш соҳалари бўйича вазирларни, вазир ўринбосарлари, давлат мулкини бошқариш раҳбарларини ўзгартиришга мажбур бўлдим. Нимага? Салоҳияти етмагандан.

Қарорларни энг қуйи ижросигача ўз вақтида ва тушунарли тилда етказиб боришни таъминлайдиган янги тизим амалга оширишимиз керак. Президент ҳужжатлари энг қуйи бўғин масъулларга етказадиган мазмунини тушунтирадиган, уларни қўллашга кўмаклашадиган амалиётни йўлга қўйишимиз керак.

Энди ҳар битта қарорни вилоят ҳокими қўл қўйишдан олдин қандай, неча кунда, қандай соҳалар бўйича, ким бориб буни ўргатади шуларни ўргатиш керак. Ўргатмасдан қуйи поғонага тушириш ман этилади.

Қуйи бўғин ходимларини соҳага оид қабул қилинган ҳар бир янги қарор бўйича ўқитилади. Агар биз шуни ўқитмасак, ўргатмасак, 2 мингтадан 600 та бажарилмаган қарорлар жуда мени хавотирга соляпти.

Мурожаатномамда айтилган телевидение, радио, рўзномаларда «Президент қарорлари ҳаётда ва назоратда» рубрикасини оддий тилда йўлга қўйиш керак. Бу қарор одамларга нима манфаат олиб келади. Одамларни қийнаётган масала аслида — мана шу.

Қуйи поғонадаги раҳбарларда дунёқараш ўзгариши керак, масъулият ўзгариши керак. Ана шунда натижа бўлади.

Бизга 2021 йил бу соҳада изланиш ва ўрганиш бўлади», – деди Шавкат Мирзиёев.

Аввалроқ Ўзбекистонда 4 босқичли ижро тизими ташкил этилиши ҳақида хабар берилди. Булар – ижрони лойиҳа босқичида режалаштириш, ижрони ташкил этиш ва кўмаклашиш, ижрони баҳолаш, ижрони назорат қилиш.