Ўзбекистонда аҳоли хонадонларига ис газини эрта аниқлайдиган газоанализаторлар ўрнатилиши мўлжалланмоқда. Бу ҳақда «Ёшларни қўллаб-қувватлаш ва аҳоли саломатлигини мустаҳкамлаш йили»да амалга оширишга оид давлат дастури лойиҳасида айтилган.

Ўзбекистон Президенти қарори лойиҳаси ишлаб чиқилади. Лойиҳада:

  • ёнғин хавфсизлигини таъминлашнинг янги тизимини жорий этиш, соҳанинг моддий-техник базасини ва кадрлар салоҳиятини тубдан мустаҳкамлаш;
  • аҳоли хонадонларини метан, пропан ва ис газини барвақт аниқлайдиган, хабар берадиган ва газни тармоқдан клапан орқали узиб қўядиган газоанализаторлар билан таъминлашни ташкил этиш;
  • янги турар жой мажмуалари қурилган, маъмурий марказдан узоқда жойлашган ҳамда ёнғинларни тезкор бартараф этиш имконияти чекланган ҳудудларда қўшимча ажратиладиган штат бирликлари ҳисобига ёнғин-қутқарув қисмлари (постлари)ни ташкил этиш;
  • ёнғин хавфсизлигини таъминлаш тизимининг самарадорлигини яна-да ошириш бўйича комплекс чора-тадбирлар дастурини тасдиқлаш;
  • ёнғин-қутқарув спортини ривожлантириш ва оммалаштириш назарда тутилади.

Бу ишларни бажариш муддати 2021 йил 1 март этиб белгиланган. Ижро учун Фавқулодда вазиятлар вазирлиги, Энергетика вазирлиги, Қурилиш вазирлиги, Иқтисодий тараққиёт вазирлиги, Молия вазирлиги, Жисмоний тарбия ва спорт вазирлиги, манфаатдор вазирлик ва идоралар, Қорақалпоғистон Вазирлар Кенгаши, вилоятлар ва Тошкент шаҳар ҳокимликлари масъул этиб белгиланган.

Аввалроқ Каттақўрғонда ис газидан оилавий заҳарланиш оқибатида уч нафар бола, Сирдарёда эр-хотин ис газидан заҳарланиш оқибатида вафот этгани ҳамда Қаршида газ портлаши оқибатида икки киши ҳалок бўлиб, бинонинг бир қисми қулаб тушгани ҳақида хабар берилганди.