«Халқ сўзи» газетасининг сайтига муҳаррирлик қилувчи Инобат Аҳатова коронавирусга қарши Хитой вакцинасининг Ўзбекистондаги синовларида кўнгилли сифатида иштирок этмоқда. У «Америка овози» мухбири Навбаҳор Имомовага берган интервьюсида у вакцина синовларига қадар коронавирусни ўзида енгил ўтказган, деб ўйлаб юргани, бироқ синов олдидан ўтказилган текширувлар бунинг аксини кўрсатганини айтиб ўтган.
Ўзбекистонда 2020 йил ноябрь—декабридан бери коронавирусга қарши Хитой вакцинаси (ЗФ 2001)нинг учинчи босқич синовлари давом этмоқда. 12 январь ҳолатига кўра, синовдаги кўнгиллилар сони 1751 нафарга етган. Умуман, шу вақтгача 4773 киши синовда иштирок этиш истагини билдирган.
Коронавирусни бошидан ўтказган фуқаролар, уларнинг организмида антитаналар борлиги сабабли, вакцина синовида қатнашиши мумкин эмас — бу клиник тадқиқот маълумотларининг тўғри чиқишига халал бериши мумкин. Расмий маълумотларга кўра, синовда иштирок этиш истагини билдирганларнинг 787 нафарида коронавирусга қарши антитаналар топилган.
«Халқ сўзи» вакили Инобат Аҳатованинг таъкидлашича, у ҳам ўзини коронавирусга чалинганлар қаторига қўшиб юрган, чунки у ўзида касаллик симптомларини кузатган.
«Мен коронавирусга чалинганман, касалликни енгил шаклда ўтказдим, деб юргандим, чунки касалликнинг ҳид, таъм билишни йўқотиш каби ҳамма аломатларини ўзимда кузатган эдим. Йўқ, вакцина синови олдидан ўтказилган текширувларда коронавирусга чалинмаганим маълум бўлди», — дейди Инобат Аҳатова.
Журналист ҳозирча вакцинанинг биринчи дозасини қабул қилган. «Ҳеч қандай салбий ҳолат кузатилгани йўқ. Нафақат менда, билишимча, синовда иштирок этаётган бошқа кўнгиллиларда ҳам ҳали жиддий салбий оқибат кузатилгани йўқ... Охиригача шундай бўлади, деган умиддаман», — деди у «Америка овози»га берган интервьюсида.
Инобат Аҳатова «Дарё» мухбири билан суҳбатда коронавирус симптомларини 2020 йил июль ойи охири—август ойи бошларида ўзида сезгани, бироқ ўша вақтда (соғлиқни сақлаш тизими, соҳа мутасаддиларининг таърифи билан айтганда, коллапс ҳолатига яқинлашиб қолганди) «барчага маълум сабабларга кўра» поликлиникага мурожаат қилмагани, вакцина синовларига қадар на ПЗР услубида, на антитаналарни аниқлаш бўйича тест топширганини маълум қилди.
Изоҳ (0)