Хитойдаги Alibaba интернет дўкони асосчиси, миллиардер Жек Ма омма олдида кўриниш бермаганига икки ойдан ошди, унинг ҳозирда қаерда эканлиги номаълум, деб ёзади Meduza.

Фото: Reuters

Financial Times’нинг аниқлашича, ноябрда Ма ўз томонидан асос солинган Africa’s Business Heroes танловининг финалига келмаган. Ушбу танловда африкалик ёш тадбиркорлар мукофот пули 1,5 миллион доллар бўлган грантлар учун беллашади. Ма ҳакамлар ҳайъати орасида ўтириши керак бўлган, бироқ у шоунинг финал эпизодини суратга олиш ишларида қатнашмаган, унинг исми сайтдаги ҳакамлар ҳайъати рўйхатидан олиб ташланган. Alibaba’нинг маълум қилишича, Ма бандлиги сабаб танлов финалига бора олмаган.

Taiwan News нашрининг ёзишича, Манинг ижтимоий тармоқлардаги сўнгги пости 17 декабрь санасида қолдирилган.

Октябрь охирида Шанхайда ўтказилган анжуманда Ма халқаро молиявий тартибга солиш нормаларини эскирган деб атаб, Хитой банклари «Ломбард менталитети»га риоя қилаётганликларини маълум қилганди. Бу Alibaba холдинги таркибига кирувчи ва Хитойдаги энг йирик мобил тўловлар платформасини бошқаришга мўлжалланган Alipay’га эгалик қилувчи Ant Group’нинг биржага чиқишидан бироз олдин содир бўлган. 5 ноябрь куни назорат пакети Мага тегишли бўлган Ant Group Шанхай ва Гонконг биржаларида IPO’ни амалга ошириши керак эди. Бу тарихдаги энг йирик IPO’га айланиб, компания 34,4 миллиард доллар жалб этиши керак бўлган.

Бироқ биржага чиқишдан икки кун олдин Хитой молиявий регуляторлари Ма ва Ant Group раҳбарларини суҳбатга чақирган. Reuters манбасининг сўзларига кўра, улар бизнесларини тўлиқ текширув кутаётгани тўғрисида огоҳлантирилган. Ant Group IPO’си қолдирилган — аввалроқ Хитой ҳукумати компания топ-менежерларига бу борада қаршилик кўрсатмасликка ваъда берган эди. Бундан ташқари, декабрь ойида Хитой регуляторлари Ant Group’ни шаффоф рақобат принципларини ва истеъмолчилар ҳуқуқларини бузишда айблаган. Мага мамлакатни тарк этмаслик маслаҳат берилган.

Манинг икки ойдан буён кўринмай қолгани сабаб Хитойнинг WeChat ижтимоий тармоғи фойдаланувчилари бизнесмен Хитойдан қочиб кетгани ёки уни «йўқолиб қолишга мажбурлашгани»ни муҳокама қилмоқда. Хитойдаги бизнес-консалтингга ихтисослашган BDА China компанияси раҳбари Дункал Кларк Reuters билан суҳбатда Ма ҳукуматнинг унинг бизнесига эътибори фонида «тинч ётган» бўлиши мумкинлигини тахмин қилди.

Собиқ инглиз тили ўқитувчиси Жек Ма 1999 йили Alibaba’га асос солган ва 2019 йилда компания раҳбарлигидан кетган. У ҳозирда капитализацияси 645 миллиард долларга тенг Хитойдаги энг йирик иккинчи компания. Яқин кунларгача Ма Хитойнинг энг бадавлат инсони эди, бироқ сўнгги икки ой ичида Alibaba акциялари нархининг тушиб кетиши унинг бойлигини 11 миллиард долларга камайишига сабабчи бўлди.