Юздаги пардоз, айниқса, кўздаги бўёқларни тозалашда энг кўп йўл қўйиладиган 8 та хато туфайли аксарият аёллар келажакда дерматолог кўригига боришига тўғри келиши мумкин. Cosmopolitan ана шу 8 хато кетма кетлигини тузиб чиқди. Улар билан танишиб чиқиш саломатлик ҳамда гўзаллик борасида фойдали бўлиши шубҳасиз.
Фото: Cosmopolitan
Макияжни пахта ёстиқчалар ёрдамида тозалаш
Узоқ йиллардан буён макияжни тозалашда ушбу усулдан фойдаланилади. Аммо бу нотўғри. Кўз атрофидаги майда ажинлар, қовоқ терисининг осилиши – айнан пахта ёрдамида ишқаланишдан келиб чиқади. Буни тўғри бажариш учун тозалаш воситасини икки марта кўпроқ намлаш ва кўзлар ёпилган ҳолда 5-7 сония тутиб, енгил ҳаракат билан юздаги бўёқларни тозалаш мумкин. Намлик остида эриган туш ва бошқа бўёқлар шундан кейингина осон тозаланиши мумкин. Шу орқали кўз атрофидаги терига зарар бермасликка эришиш мумкин.
Қовоқ ва кўзларни тозалашда битта воситадан фойдаланиш
Кўпинча аёллар юз ва кўз бўёқларини тозалашда умумий бўлган юз пардозини тозаловчи воситадан фойдаланади. Афсуски, юз учун мўлжалланган восита кўз атрофи териси учун мос келмайди ва натижада бир қанча муаммолар пайдо бўлади. Қайтага кўз атрофи терисига мўлжалланган тозаловчи воситадан юз учун ҳам фойдаланиш унчалик ҳам зарар келтирмайди. Агар турли хил воситадан фойдаланиш қийинчилик туғдирса, кўпроқ кўз соҳаси териси учун мўлжалланган воситадан фойдаланган афзал.
Кўзни ўнг ва чапга ҳаракат қилиш орқали тозалаш
Киприклардаги тушни орқа ва олдинга ҳаракатлантириш орқали тозалаш кўпчиликда кузатиладиган ҳолат. Шундан сўнг, албатта, киприк ҳам тўкилади. Тепадан пастга қараб, яъни киприк илдизларидан то учигача йўналтирилган ҳаракат орқали тозалаш мақсадга мувофиқ.
Макияжни тозалашдан сўнг юзни ювмаслик
Пардоз тозаловчи воситани қўллагандан сўнг юз терисида қандайдир ёпишқоқ қатлам пайдо бўлади. Ушбу жараёндан сўнг юзни пенка ёрдамида ювиш тавсия этилади. Бундан ташқари, намлантирувчи крем суриш ҳам яхши натижа беради.
Пахтадан нотўғри фойдаланиш
Кўпинча тежамкорлик туфайли икки томонлама тозалаш имкони мавжуд бўлган пахта ёстиқчасидан фойдаланилади. Бир томони ишлатишга яроқсиз ҳолга келганида ҳам иккинчи тарафидан фойдаланишда давом этилади. Бу ҳам навбатдаги хатолардан бири бўлиб, тери тозаланиши ўрнига бўёқлар тери юзасига қайта сурилади. Шунинг учун бу каби пахта ёстиқларни тўрт қисмга букиб, сўнгра фойдаланиш самарали усул ҳисобланади.
Макияж тозалаш жараёнини тўлиқ якунламаслик
Айрим қизлар кўз соҳаси териси жуда нозик эканлигидан хабар топганидан сўнг уларни охиригача мукаммал тозаламайди. Албатта, киприклар орасида туш қолдиқлари қолиб кетади ва бунга унчалик ҳам эътибор берилмайди. Қачонки пахта юзасида бўёқлар акс этмагандагина, тозалаш охиригача якунланган деб ҳисоблаш мумкин.
Қошларни тозаламаслик
Қошга сурилувчи воситалар одатда ёғли ёки мумга асосланган бўлиши мумкин. Уларни тозаламаслик натижасида қош толалари сийраклашиб, тўкилишига ҳам олиб келади. Шунинг учун кўз соҳаси тозаланганда қошларни ҳам унутмаслик лозим.
Қовоқларга пилинг ёки скраб суртиш
Бу жараён майда ажинларни бартараф этади, деб ўйлаш нотўғри фикр. Аксинча, бу орқали яна кўз териси зарар кўради. Терининг шу қадар нозиклиги туфайли ҳар қандай ташқи кимёвий ёки жисмоний таъсир унинг жароҳатланишига олиб келади. Унутмаслик керак, кўз соҳаси терисини намлаш ва жуда нозик ҳаракатлар билан тозалаш тавсия этилади.
