«Манчестер Юнайтед»да Эдвин ван дер Сар, Испания терма жамоасида Икер Касильяснинг ўрнини нафақат эгаллаган, балки уларнинг йўқлигини билинтирмаган Давид де Хеа, шубҳасиз, сўнгги 10 йилликнинг энг яхши дарвозабонлари қаторида тилга олинади. Бу вақт оралиғида эса у кўпгина футбол ишқибозларининг кўнглидан жой олишга улгурди. Айнан унинг мухлислари учун қуйида дарвозабоннинг ҳашаматли ҳаёти ҳақида ҳикоя қиламиз.
Уйи
Давид де Хеа «Манчестер Юнайтед» шарафини 2011 йилдан бери ҳимоя қилиб келаётганига қарамай, бор-йўғи 2018 йилдагина ушбу шаҳардан шахсий уй харид қилган. Ушбу уйнинг нархи 2,5 миллион еврога тенг. Уйдан 6 та ётоқхона, кино ва машғулот заллари ҳамда кичик боғ ўрин олган.
Машиналари
Исталган одам фақат ҳавас қилиши мумкин бўлган гаражга эга бўлса-да, де Хеа ўз автомобилларини кўз-кўз қилишни ёқтирмайди. Унинг автопаркидан Aston Martin Vantage (135 минг евро), Mercedes-Benz Vito (60 минг доллар), Mercedes-Benz GLE (120 минг доллар), Audi RS5 Coupe (86 минг евро) каби анча номдор темир аравалар ўрин олган.
Шунингдек, 2015 йилда «Манчестер Юнайтед» ўз футболчиларидан ҳомий Chevrolet компаниясининг автомобилларини ҳайдашни сўраган. Давид эса ўзига Captiva русумли машинани танлайди.
Шахсий ҳаёти
Давид ҳаёт йўлларини ўзидан 5 ёшга катта бўлган Эдурне Гарсия исмли қиз билан боғлаган. Эдурне модель, актриса ва қўшиқчи сифатида фаолият олиб боради.
Дўстлари
Давиднинг ҳам «Юнайтед» ҳам Испания терма жамоасида бир қанча дўстлари бор. Бироқ уларнинг ичида де Хеа учун энг яқини, бу Хуан Матадир. Уларни ҳам майдонда, ҳам унинг ташқарисида тез-тез бирга кўриш мумкин.
Шунингдек, посбон 2011—2015 йилларда «қизил иблислар» сафида тўп сурган Чичарито билан ҳам илиқ муносабатларга эга. Давиднинг айтишича, улар ҳамон дўстлик алоқаларини сақлаб қолган.
Футболдан ташқари қизиқишлар
Де Хеа футболдан бўш вақтларини асосан баскетбол ўйнаш, мусиқа тинглаш ва реклама роликларида суратга тушиш билан ўтказади. Бундан ташқари, у тез-тез персонал ва жамоа мухлислари билан учрашишни хуш кўради.
Даромади
Де Хеанинг «Манчестер Юнайтед»даги бир йиллик маоши 23 миллион еврони ташкил қилади. Қайд этиш жоиз, бу Туманли Албион клубларидаги энг юқори маошлардан биридир.
Бундан ташқари, голкипер юқорида таъкидланганидек, рекламаларда суратга тушиш ва компаниялар билан ҳамкорлик шартномаларини имзолашни канда қилмайди. Forbes маълумотларига кўра испаниялик посбоннинг 2020 йилдаги соф даромади 27 миллион долларни ташкил қилган.
Изоҳ (0)