Тадбиркорлик субъектларини давлат рўйхатидан ўтказиш тартиби тўғрисидаги низомга ўзгартириш ва қўшимчалар 2020 йил 2 декабрдаги Вазирлар Маҳкамаси қарори билан киритилди. Улар қарор эълон қилингандан эътиборан уч ой ўтгач кучга киради. Бу ҳақда Norma хабар қилди.
Маълум қилинишича, низомнинг 19-бандига қуйидаги хатбошилар қўшилди, уларга асосан:
- банклар жиноий фаолиятдан олинган даромадларни легаллаштиришга қарши курашиш бўйича молиявий чоралар ишлаб чиқувчи гуруҳнинг талабларидан келиб чиқиб, ариза берувчиларни масофадан туриб идентификация қилиш учун зарур бўлган шарт-шароитлар мавжуд бўлганда, муассислари Ўзбекистон резидентлари бўлган юридик шахслар ҳамда якка тартибдаги тадбиркорларни давлат рўйхатидан ўтказиш жараёнида уларга миллий ва чет эл валютасидаги банк ҳисоб варақларини масофадан туриб очиши мумкин;
- банк ҳисоб варағи тизимда жойлаштирилган банк ҳисоб варағи шартнома офертасини аксептлаш йўли билан очилади.
- юридик шахснинг манзилини ўзгартириш билан боғлиқ қайта рўйхатдан ўтказишда — БҲМнинг 300 бараваридан ортиқ солиқ қарзи мавжудлиги ёки амалга оширилган товар айланма ёхуд товарлар импорти бўйича реализация ҳажмининг солиқ ҳисоботларида тўлиқ акс эттирилмаганлиги, шунингдек, солиқ ҳисоботларини белгиланган муддатларда топширмаганлиги;
- улушнинг бошқа шахсга ўтиши билан боғлиқ қайта рўйхатдан ўтказишда — муассиснинг муассислар рўйхати ўзгаришига розилиги мавжуд эмаслиги.
Юридик шахс тадбиркорлик субъектини давлат рўйхатидан ўтказиш учун ариза шакли «Мижознинг бенефициар мулкдори тўғрисида сўровнома», шунингдек, «Ходимларни жамғариб бориладиган пенсия тизимида ҳисобга қўйиш» бўлимлари билан тўлдирилди. Шу тариқа, давлат рўйхатидан ўтказиш билан бир вақтда тадбиркор ходимларни жамғариб бориладиган пенсия тизимида ҳисобга қўяди.
Бошқа ўзгартириш ва қўшимчалар ҳам назарда тутилган. Ҳужжат 2021 йил 4 сентябрь куни кучга киради.
Аввалроқ Давлат хизматлари агентлиги юридик шахсларни давлат рўйхатидан ўтказиш бўйича ягона ваколатли органга айланиши мумкинлиги, Ўзбекистонда электр таъминотидаги узилишлар туфайли тадбиркорлик субъектларига 1,6 миллиард сўмдан ортиқ зарар етказилганлиги ҳамда Ўзбекистонда тадбиркорлар давлат хизматлари кўрсатилишида агент сифатида иштирок этиши мумкин бўлиши ҳақида хабар берилганди.
Изоҳ (0)