Bentley Mulliner бўлинмаси биринчи Blower Continuation прототипини йиғишни якунлади. Cаr Zero номини олган модель ресурс синовлари ва максимал даражада ҳаракатланиш учун мўлжалланган. Унинг ортидан яна 12 та машина ишлаб чиқарилади, бироқ уларнинг барчаси аллақачон сотиб бўлинган, деб ёзади Motor.
Bentley Blower — 4½ Litrе (1927–1931) моделининг компрессор версияси бўлиб, Roots узатмаси билан жиҳозланган. Унинг ҳисобида кўплаб спорт ғалабалари, бир нечта тезлик рекордлари мавжуд, масалан, 1932 йилда Blower No.1 Monoposto Англиянинг Бруклендс трассасида соатига 222 километр тезликда ҳаракатланган. Бу каби нусхадан жами 55 та яратилган. Эндиликда улар қаторига 12 та Team Blower нусхалари ҳам қўшилади. Моделлар оригинал чизмалар асосида, ишлаб чиқаришнинг замонавий усуллари орқали яратилади.
Машиналар асосини HB 3403 шасси рақамига эга Bentley ташкил этади, унда британиялик пойгачи Генри Биркин ҳаракатланган. Машина тўлиқ майда қисмларга ажратилган, ҳар бир деталь 3D лазер сканери ёрдамида текширилиб, виртуал CAD-модели йиғилган. «Ноль нусха»нинг дизайнини яратиш ва уни йиғишга 40 минг соат кетган бўлиб, у 1846 та индивидуал лойиҳалаштирилган ва тайёрланган деталлардан иборат.
Иккинчи жаҳон урушига қадар яратилган биринчи Bentley моделининг нусхасини йиғиш учун бутун Буюк Британия бўйлаб кўплаб мутахассислар жалб этилган. Масалан, модель шассисини Israel Newton & Sons компанияси, Vintage Car Radiator фирмаси эса мис-пўлат бензобакни ишлаб чиқарган.
Эски-янги Bentley Blower кузови Lomax Coachbuilders томонидан шумтолдан ясалган каркасга эга бўлиб, 25 метрли Рехина сунъий чарми билан қопланган. Cаr Zero прототипи учун Bridge od Weir қизил чарми билан уйғунлашган қора ранг танланган. Оригинал машинада ўриндиқ 10 килограммли от юнги билан тўлдирилган. Blower шу каби кўринишда ресурс синовларига юборилади ва у ерда модель 9 минг километр йўл босади.
Bentley Blower сериясининг «давоми»ни ишлаб чиқариш барчага ҳам маъқул келмаган. Таъсир доираси кенг бўлган Bentley эгалари ва марканинг ишқибозлари, хусусан, моделер Ральф Лоэрн ва ЖCБ директорлар кенгаши раиси Энтони Бемфорд компания раҳбари Эдриан Холлмаркка мурожаат қилиб, бу каби машиналарни ишлаб чиқариш борасидаги қарорни яна бир бор ўйлаб кўришга чақирган. Петиция муаллифларининг сўзларига кўра, «оригинал нусха»нинг ишлаб чиқарилиши ҳақиқат ва хаёл ўртасидаги чегарани аралаштириб юборади.
Изоҳ (0)