Bentley Mulliner bo‘linmasi birinchi Blower Continuation prototipini yig‘ishni yakunladi. Car Zero nomini olgan model resurs sinovlari va maksimal darajada harakatlanish uchun mo‘ljallangan. Uning ortidan yana 12 ta mashina ishlab chiqariladi, biroq ularning barchasi allaqachon sotib bo‘lingan, deb yozadi Motor.
Bentley Blower — 4½ Litre (1927–1931) modelining kompressor versiyasi bo‘lib, Roots uzatmasi bilan jihozlangan. Uning hisobida ko‘plab sport g‘alabalari, bir nechta tezlik rekordlari mavjud, masalan, 1932-yilda Blower No.1 Monoposto Angliyaning Bruklends trassasida soatiga 222 kilometr tezlikda harakatlangan. Bu kabi nusxadan jami 55 ta yaratilgan. Endilikda ular qatoriga 12 ta Team Blower nusxalari ham qo‘shiladi. Modellar original chizmalar asosida, ishlab chiqarishning zamonaviy usullari orqali yaratiladi.
Mashinalar asosini HB 3403 shassi raqamiga ega Bentley tashkil etadi, unda britaniyalik poygachi Genri Birkin harakatlangan. Mashina to‘liq mayda qismlarga ajratilgan, har bir detal 3D lazer skaneri yordamida tekshirilib, virtual CAD-modeli yig‘ilgan. “Nol nusxa”ning dizaynini yaratish va uni yig‘ishga 40 ming soat ketgan bo‘lib, u 1846 ta individual loyihalashtirilgan va tayyorlangan detallardan iborat.
Ikkinchi jahon urushiga qadar yaratilgan birinchi Bentley modelining nusxasini yig‘ish uchun butun Buyuk Britaniya bo‘ylab ko‘plab mutaxassislar jalb etilgan. Masalan, model shassisini Israel Newton & Sons kompaniyasi, Vintage Car Radiator firmasi esa mis-po‘lat benzobakni ishlab chiqargan.
Eski-yangi Bentley Blower kuzovi Lomax Coachbuilders tomonidan shumtoldan yasalgan karkasga ega bo‘lib, 25 metrli Rexina sun’iy charmi bilan qoplangan. Car Zero prototipi uchun Bridge od Weir qizil charmi bilan uyg‘unlashgan qora rang tanlangan. Original mashinada o‘rindiq 10 kilogrammli ot yungi bilan to‘ldirilgan. Blower shu kabi ko‘rinishda resurs sinovlariga yuboriladi va u yerda model 9 ming kilometr yo‘l bosadi.
Bentley Blower seriyasining “davomi”ni ishlab chiqarish barchaga ham ma’qul kelmagan. Ta’sir doirasi keng bo‘lgan Bentley egalari va markaning ishqibozlari, xususan, modelyer Ralf Loern va JCB direktorlar kengashi raisi Entoni Bemford kompaniya rahbari Edrian Xollmarkka murojaat qilib, bu kabi mashinalarni ishlab chiqarish borasidagi qarorni yana bir bor o‘ylab ko‘rishga chaqirgan. Petitsiya mualliflarining so‘zlariga ko‘ra, “original nusxa”ning ishlab chiqarilishi haqiqat va xayol o‘rtasidagi chegarani aralashtirib yuboradi.
Izoh (0)