Сирдарё вилояти Гулистон шаҳрида Шавкат Мирзиёевнинг 2018 йил 2 августдаги «Республика ҳудудларида ‘Business City’ замонавий ишбилармонлик марказларини ташкил этиш чора-тадбирлари тўғрисида»ги фармони ижроси доирасида «Guliston Business City» раҳбарияти томонидан замонавий бизнес марказининг қурилиш концепцияси ишлаб чиқилади, дея хабар бермоқда ЎзА.
Умумий майдони 70 гектарни ташкил этган бизнес марказида замонавий стандартларга жавоб берувчи кўп қаватли уйлар, ижтимоий соҳа объектларидан мактаб, музей, спорт ва тиббиёт марказлари, банк, меҳмонхона, давлат идоралари, офис, маиший ва хизмат кўрсатиш марказлари, кўнгилочар жойлар, хиёбонлар ҳамда кинотеатрлар барпо этилади.
Қурилиш режасини амалга ошириш жараёнида илғор усуллар, жумладан, лойиҳаларни ишлаб чиқиш, уларни режалаштириш ҳамда маълумотларни қайта ишлаб чиқиш бўйича рақамли ечимларни жорий этишга эътибор қаратиш режалаштирилган.
Хавфсизлик тизимининг сўнгги ва замонавий инновацион ишланмалари, коммунал хизматлар нархларини оптималлаштириш асосида юқори даражадаги «ақлли» уй технологияларини жорий этиш режалаштирилган. Буларнинг барчаси масофадан туриб, мобил иловалар орқали кириш имкониятидан фойдаланган ҳолда аҳоли ва бино эгалари томонидан назорат қилинади.
Маълум қилинишича, 2021 йилнинг 1 декабридан техник шартларини таъминлаш мақсадида магистрал канализация тармоқларини қуриш ишлари бошланади. Қурилиш жараёнида, аввало, магистрал алоқа тармоқлари тизими – сув таъминоти, канализация, электр энергияси, газ ва интернет тармоқларини йўлга қўйиш ишлари ҳам амалга оширилади.
Ҳозирда «Guliston Business City» раҳбарияти томонидан хорижий инвесторларни жалб этиш мақсадида шароитлар яратилмоқда.
«Guliston Business City» қурилиши режалаштирилган ҳудудда Мурад Building фирмаси раҳбари Мурод Назаров, Dantes Construction етакчиси Дантес Устажалилов, BI Group бошлиғи Ойдин Рахимбоев каби йирик маҳаллий ва хорижий инвестиция компаниялари раҳбарлари билан учрашув ўтказилди.
Айни пайтда бизнес марказининг раҳбарияти қурилиш жараёнларини янада жонлантириш мақсадида маҳаллий ва хорижий инвесторларни кенгроқ жалб этиш ишлари амалга оширмоқда.
Аввалроқ Наманганда миллиардер Алишер Усмонов ҳомийлигида Халқаро бизнес маркази қурилиши 2021 йил баҳорида бошланиши ҳамда Тошкентдаги Ғафур Ғулом номидаги истироҳат боғи бузилиб, ўрнига турар жой мажмуаси қурилиши ҳақидаги хабарга муносабат билдирилгани ҳақида хабар берилганди.
Изоҳ (0)