Россияда 2020 йилда 41 та терактнинг олди олингани маълум қилинди

Россия махсус хизматлари 2020 йилда мамлакат ҳудудида 41 та терактнинг олдини олди. Бу ҳақда Федерал хавфсизлик хизмати директори, Миллий антитеррор қўмитаси раиси Александр Бортников маълум қилди, деб ёзмоқда «Интерфакс».

«Тайёргарлик босқичида бўлган террористик йўналишдаги 61 та жиноятнинг, шу жумладан, 41 та терактнинг олди олинди», — дейилади қўмита хабарида.

Қўмита томонидан қайд этилишича, 2020 йилда 49 нафар жангари, шу жумладан, 8 нафар гуруҳ бошлиғи йўқ қилинган, 36 нафар тўда бошлиғи, 162 нафар жангари ва уларнинг 591 нафар шериги қўлга олинган.

Россия ҳудудида 2020 йилда халқаро террорчилик гуруҳларининг 55 та ҳужраси фаолиятига чек қўйилган. Экстремистик ва террористик фаолиятга алоқадор бўлган 149 нафар хорижлик Россия ҳудудига киритилмаган.

Жангарилардан 600 дона ўқотар қурол, 134 та қўлбола бомба, 100 мингдан ортиқ патрон, 3 мингдан ортиқ мина, граната ва бошқа ўқ-дорилар олиб қўйилган. Қурол ишлаб чиқариш ва уларни ўзгартириш билан шуғулланувчи 50 та ноқонуний устахона йўқ қилинган.

Аввалроқ Россия Федерал хавфсизлик хизмати Волгоград шаҳрида Суриядаги террорчилар кўрсатмаси асосида теракт режалаштирган икки нафар жангарини йўқ қилганди, Кейинроқ мазкур шахслар Ўзбекистон фуқаролари бўлгани маълум қилинди.