Ўзбекистонда экология ва атроф-муҳитни муҳофаза қилиш, шунингдек, чиқиндиларни йўқ қилиш соҳасидаги айрим қонунбузарликлар учун жарима миқдори оширилди, деб ёзмоқда «Gazeta.uz». Бу Президент томонидан 3 декабрь куни имзоланган қонун ҳужжатларига ўзгартириш ва қўшимчалар киритиш тўғрисидаги қонунда кўзда тутилган.
Ҳужжат билан Жиноят кодексининг 198-моддасига (экинзор, ўрмон ёки бошқа дов-дарахтларга шикаст етказиш ёки уларни нобуд қилиш) тузатиш киритилди. Унга кўра, 4 декабрдан бошлаб оловга эҳтиётсизлик билан муносабатда бўлиш натижасида экинзор, ўрмон ёки бошқа дов-дарахтларга шикаст етказиш ёки уларни нобуд қилиш кўп миқдорда зарар етказилиши ёки бошқача оғир оқибатларга сабаб бўлган экологик ҳуқуқбузарликлар учун базавий ҳисоблаш миқдорининг 50 баравардан 100 бараваригача жарима ёки 240 соатгача соатгача мажбурий жамоат ишлари ёхуд 1 йилгача ахлоқ тузатиш ишлари билан жазоланади (аввалроқ БҲМнинг 50 бараваригача жарима бўлган, қолган қисмлар ўзгармаган).
Бундан ташқари, ўрмон ёки бошқа дов-дарахтларни қонунга хилоф равишда кесганлик учун БҲМнинг 100 бараваридан 150 бараваригача миқдорда жарима ёки 240 соатдан 300 соатгача мажбурий жамоат ишлари ёки 1 йилдан 2 йилгача ахлоқ тузатиш ишлари ёхуд 1 йилдан 2 йилгача озодликни чеклаш ёки 3 йилгача озодликдан маҳрум қилиш билан жазоланади (аввалроқ БҲМнинг 50 дан 70 бараваригача жарима билан жазоланган, қолган қисмлар ўзгармаган).
Қайд этилишича, ушбу санкциялар БҲМнинг 300 бараваридан 500 бараваригача бўлган зарар етказилганда қўлланилади.
Қонун билан Маъмурий жавобгарлик тўғрисидаги кодексга ҳам ўзгартиришлар киритилди, хусусан, 162-моддада кўрсатилган жавобгарлик 79-моддага киритилди. Дарахтлар, буталар, бошқа ўрмон ўсимликлари ва ниҳолларни ғайриқонуний равишда кесиш, шикастлантириш ёки йўқ қилиш ҳуқуқбузарлигини қайта содир этганлик учун жарима миқдори оширилди — жисмоний шахслар учун БҲМнинг 20 бараваридан 30 бараваригача, юридик шахслар учун эса БҲМнинг 20 бараваридан 30 бараваригача этиб белгиланди, шунингдек улардан ҳуқуқбузарлик содир этишда фойдаланилган қурол мусодара қилинади.
Бундан ташқари, қаттиқ маиший қурилиш чиқиндиларини, шунингдек суюқ маиший чиқиндиларни белгиланмаган жойларга ташлаганлик учун жарималар оширилди — жисмоний шахслар учун БҲМнинг 1 бараваридан 3 бараваригача, мансабдор шахслар учун 10 бараваридан 20 бараваригача. Ушбу ҳуқуқбузарлик такрор содир этилса — жисмоний шахслар учун БҲМнинг 5 бараваридан 10 бараваригача, мансабдор шахслар учун эса 20 баравардан 30 бараваргача жарима солишга сабаб бўлади.
Ҳужжат билан, шунингдек, юридик шахсларга қарашли ёки бириктирилган ҳудудларда дарахтларни муҳофаза қилиш ва асраб-авайлаш чоралари кўрилмаганлиги учун жавобгарлик жорий этилди — мансабдор шахслар учун жарима миқдори БҲМнинг 10 бараваридан 20 бараварича бўлади.
Изоҳ (0)