Қашқадарё вилоятининг Яккабоғ туманида фаолият кўрсатувчи тадбиркор аёл Зуҳра Муқимова метан заправка қуриш учун кўплаб муаммоларга дуч келганини айтиб, уни қийнаётган муаммо туман ҳокими билан ечим топмагач, вилоят ҳокими қабулига борганини, аммо Зоир Мирзаев қабулига киролмаётганини айтмоқда.
«Дарё» мухбири муаммони ўрганиш учун Яккабоғ туманида бўлди.
«2010 йил метан заправка қуриш ҳаракатига тушгандим. 2018 йил банкдан 5 миллиард сўм кредит олиб, ўзимнинг маблағларимни қўшиб салкам 10 миллиард сўмга заправка қурдим. 2020 йил октябрь ойи якунида заправкам битди. Ҳаммаси тайёр. Бироқ газ берилмаяпти. Шу сабаб фаолият кўрсатолмаяпмиз», — дейди Яккабоғ туманида фаолият кўрсатувчи тадбиркор Зуҳра Муқимова.
Тадбиркор аёлнинг маълум қилишича, у муаммога ечим топиш мақсадида дастлаб туман ҳокими Лутфиддин Абдуллаевнинг қабулида бўлган.
«Туман ҳокими Лутфиддин Абдуллаев қабулида бўлиб, ёрдам сўрадим. Ҳоким дастлаб ёрдам беришини айтди. Ва ишчиларидан бирининг номерини бериб, шу инсон билан боғланасиз ва сизнинг муаммонгизни ҳал қиламиз деди. Яккабоғга ҳам тушунган ҳоким ишга келибди деб, хурсанд бўлдим. Аммо кейин ёрдам беролмаслигини айтди», — дейди тадбиркор аёл.
«Дарё» мухбири билан суҳбатлашган Яккабоғ тумани ҳокими Лутфиддин Абдуллаев тадбиркор аёл мурожаат қилганини тасдиқлаб, туман ҳокимлиги томонидан қилиниши лозим бўлган ишлар бажарилганини маълум қилди.
«Туман ҳокими сифатида тадбиркор билан бир неча маротаба суҳбатлашганман. Метан заправка учун ер берилган. Шунингдек, компрессор учун яна ер ажратиб бердик. Хуллас, туманда қилиниши лозим бўлган ишлар якунига етказилган. Қолаверса, ҳоким сифатида вилоят ташкилотлари билан ҳам гаплашиб, тадбиркорга ёрдам беряпмиз», — деди туман ҳокими.
Лутфиддин Абдуллаевнинг маълумот беришича, тадбиркор аёл айнан газ берилмаётгани ҳақида ҳокимга мурожаат қилмаган.
«Тадбиркор заправкаси учун айнан газ муаммо бўлаётганини менга айтмаганди», — дейди ҳоким.
Зуҳра Муқимованинг айтишича, у вилоят ҳокими Зоир Мирзаевнинг тадбиркорлар муаммосини ҳал этаётгани ҳақида ижтимоий тармоқлари орқали хабар топгач, вилоят ҳокими қабулига борган.
«Вилоят ҳокими кўплаб тадбиркорларнинг муаммосини ҳал этяпти. Буни ижтимоий тармоқларда кузатиб боряпман. Аммо менга ўхшаган тадбиркорлар ҳоким қабулига киролмаяпмиз. Сабаби ҳоким атрофидаги ходимлар бунга йўл қўймайди. Улар ўзларига тегишли одамларни ҳоким қабулига киритмоқда. Вилоят ҳокими унинг олдига кирган тадбиркорлар ҳокимият ходимларининг одамлари эканлигини билмайди-ку. Ҳоким қабулига кирган тадбиркорлар муаммоси эса ҳал этиляпти», — дейди мурожаатчи тадбиркор.
Тадбиркорнинг аниқлик киритишича, у вилоят ҳокимлигида Тўра ва Жамшид Раҳмонқулов исмли масъулларга учрашган.
«Вилоят ҳокимига киритамиз деб чақиришди. Борсам, ҳар хил баҳоналарни айтиб, киритишмади. Айтишларича, вилоят ҳокимига кириш босқичма-босқич амалга оширилар экан. Аввал ўринбосарларга киришим керак экан. Билмадим, ҳокимга кириш учун нечта ўринбосардан ўтишим керак?», — дейди тадбиркор.
«Дарё» мухбири билан суҳбатлашган вилоят ҳокимининг биринчи ўринбосари котибияти мудири Жамшид Раҳмонқулов тадбиркор унга ҳам вилоят раҳбарига кирмоқчилигини айтганини тасдиқлади.
«Тўғри, тадбиркор менга ҳам вилоят ҳокими қабулига кирмоқчилигини айтганди. Аммо мен уни вилоят ҳокимига олиб кириш менинг ваколатимга кирмаслигини, ҳоким қабулига кирмоқчи бўлса, бемалол кириши мумкинлигини айтдим. Масъул сифатида эса ўз ишимни бажариб, тадбиркорга ёрдам бериш ҳаракатидаман», — дейди Жамшид Раҳмонқулов.
Иши битмай, сарсон-саргардонликдан қийналаётган тадбиркор аёл Қашқадарёда тадбиркорлик учун имконият йўқлигини айтиб, энди тадбиркорлик қилмаслигини, тадбиркорлик қилиш ниятида бўлган инсонларга ҳам бундай маслаҳат бермаслигини айтмоқда.
«Айнан Қашқадарёда тадбиркорлик қилиб бўлмайди, энди тадбиркорлик қилмоқчимасман. Банкдан олган кредитим кўпайиб бормоқда. Кредитимни ёпиш учун эса заправкам ишга тушиши керак. Лекин ишлолмаяпмиз. Муаммони вилоят раҳбарига билдирмоқчи эдим. Аммо киролмаяпман. Шунинг учун бундан кейин тадбиркорлик қилмоқчи бўлганларга, тадбиркорлик қилишни маслаҳат бермайман», — дейди тадбиркор аёл.
Ҳокимлик масъулининг айтишича, тадбиркор қурган заправкага газ берилиши учун алоҳида газ тақсимловчи станция қуриш лозим бўлади. Буни эса тадбиркорнинг ўзи қуриши керак.
«Билишимча, муаммо мана шунда, — дейди Жамшид Раҳмонқулов. — Тадбиркор заправка учун газ тақсимловчи станция қурмаган. Масъул ташкилотлар буни ўз зиммасига ололмайди. Тадбиркор эса масъулларга шуни қуриб беришни илтимос қиляпти», — дейди вилоят ҳокимлиги вакили.
Автомобилларга сиқилган газ қуйиш шохобчаларига газ берилишини назорат қилувчи Тошкент магистрал газ қувурлари бошқармаси масъул ходими Улуғбек Сафаров тадбиркор муаммосини ҳал этиш учун 2020 йил 30 ноябрь куни махсус ишчи гуруҳ туманга боришини айтиб, унга қадар тайинли маълумот беролмаслигини билдирди.
Эслатиб ўтамиз, Президент Шавкат Мирзиёев 2020 йил 12—13 ноябрь кунлари вилоятга ташрифи чоғида вилоят ҳокими бошчилигидаги туман ва шаҳар раҳбарлари билан мулоқотда вилоятда тадбиркорликни ривожлантириш учун барча ҳокимлар ҳар куни тадбиркорни қийнаётган муаммони ҳал этиш билан шуғулланиши лозимлигини айтиб, 2021 йил вилоятда тадбиркорликни ривожлантириш йили бўлиши лозимлигини билдирганди.
«Дарё» тадбиркор муаммоси қай тарзда ҳал қилинишини кузатишда давом этади.
Изоҳ (0)