Қўқон давлат педагогика институти талабаси дарсга ўз вақтида қатнашмаган бошқа талабага ўқитувчидан баҳо олиб бериш эвазига 300 доллар олаётганда қўлга олинган. Бу ҳақда 30 ноябрь куни вилоят прокурори Улуғбек Қосимов иштирокидаги матбуот анжуманида маълум қилинди, дея хабар берди «Дарё» мухбири Азизжон Эрматов.
Маълум бўлишича, Қўқон давлат педагогика институтининг табиий фанлар факультети талабаси Н.У. ўзи ўқиётган факультет декани орқали бошқа бир талаба М.В.нинг ўқишга келмаган кунлари ва баҳоларини тўғрилатиб бериш эвазига 300 доллар олган вақтида ушланган. Фарғона политехника институти ўқув-услубий бошқармаси бошлиғи А.М. 3 минг доллар эвазига талаба К.К.нинг ўқишини иқтисодиёт йўналишига кўчириб беришини ваъда қилиб, 1500 доллар олган вақтида ушланган.
Шунингдек, Риштон туман халқ таълими бўлими мудири И.М. ва кадрлар бўлими мутахассиси А.В. малака тоифаси муддати ўтган 77 нафар ўқитувчига қалбаки ҳужжатлар асосида малака белгилаган. Устама ҳақларини ноқонуний тўлаш ва бошқа суиистеъмолликлар оқибатида 414 миллион сўм бюджет маблағларини талон-торож қилган.
Қўқон шаҳридаги 41-мактаб директори Г.Қ. ва ўринбосари Д.Т. икки нафар ўқувчини 1-синфга ўқишга қабул қилиш эвазига 250 доллар, 300 минг сўм олаётганида, 8-мактаб директори Ф.Д. фуқаро Н.Н.ни мактабга ярим ставкага кутубхоначи ва 0,2 ставка лаборант вазифасига ишга қабул қилиши эвазига 100 доллар ва 850 минг сўм, Марғилон шаҳридаги 31-мактаб директори вазифасини бажарувчи А.Д. фуқаро Д.Ж.ни техник лавозимга тайинлаш эвазига 150 доллар олаётган вақтда ушланган.
Изоҳ (0)