Apple автомобиллар олд ойнасидаги микроёриқларни аниқлашга ёрдам беради

Apple компанияси АҚШда автомобилнинг олд ойнасидаги микроёриқларни бир зумда аниқлайдиган технологияни патентлади. АҚШ Патентлар ва товар белгилари базасида (USPTO) технологияга оид маълумотлар ва унинг ишлаш жараёни тасвирланган суратлар пайдо бўлган, деб ёзади Motor.

Бу каби технология олд ойнани иситиш функциясига эга автомобиллар учун фойдали. Гап шундаки, микроёриқлар иситиш тизимининг ишига салбий таъсир кўрсатиши мумкин — улар орқали сув ўтиб, шикаст етади. Apple’да эса ушбу муаммонинг ечими бор: компания ойна қаватлари орасида ток ўтказувчи шаффоф плёнкани жойлаштиришни таклиф этмоқда, у бир неча сонияда инсон кўзи илғамайдиган ёриқларни аниқлаши мумкин.

Шунингдек, тахминларга кўра, плёнкадан яна бир мақсадда фойдаланиш мумкин — машинани ўғирлаб кетилишига қарши. Агарда у борт электроникасига уланса, ойнага шикаст етган тақдирда двигателни блоклаб қўйиши ва автомобиль эгасига машинага ўғри тушгани ҳақида хабар бериши мумкин.

Бироқ Apple мазкур технологияни патентлади дегани, ундан яқин кунларда фойдаланиш мумкин бўлишини англатмайди. Бу каби опсия серияли автомобилларда умуман пайдо бўлмаслиги ҳам мумкин.

Аввалроқ Apple масофадан туриб гуруҳ бўлган ҳолда селфига тушиш технологиясини патентлагани маълум бўлганди.