Ўзбекистон Молия вазирлиги айрим қонунчилик ҳужжатларига ўзгартириш ва қўшимчалар киритишни назарда тутувчи 2021 йилга мўлжалланган солиқ сиёсати лойиҳасини эълон қилди.
Унда, жумладан, жисмоний шахслардан олинадиган мол-мулк солиғи объектлари қаторидан кўп квартирали уйларга узвий боғлиқ бўлган автомашина турар жойлари, шунингдек бошқа иморатлар, бинолар ва иншоотлар ҳам ўрин олмоқда. Яъни, янги қурилаётган уй-жойларда ертўла ёки иккинчи қаватида (одатда) жойлашган «парковка»ларга ҳам уй сотиб олганлар солиқ тўлаши керак бўлади.
Агар Солиқ кодексининг 419-моддасига киритиш таклиф этилаётган ўзгартириш тасдиқланса, у ҳолда уй-жойлар ва квартиралар, дала ҳовли иморатлари (умумий майдони 200 квадрат метрдан ортиқ бўлганлари бундан мустасно), кўп квартирали уйларга узвий боғлиқ бўлган автомашина турар жойлари, шунингдек, бошқа иморатлар, бино ва иншоотлар 0,23 фоиз миқдорда солиққа тортилади (ҳозирда 0,2 фоиз).
Қайд этиш жоиз, айни вақтда қонунчиликда машина турар жойлари деган тушунча мавжуд эмас.
Машина турар жойлари (автотураргоҳлар) 2017 йил 1 январдан расман кўчмас мулк объекти мақомони олган ва «чегаралари белгиланган тартибда тавсифланган, фақат транспорт воситасини жойлаштириш учун мўлжалланган бино ёки иншоотнинг бир қисми» дея келтирилган. Солиқ эса объектнинг кадастр қийматидан келиб чиқиб ҳисобланади.
Аввалроқ 2021 йилга мўлжалланган солиқ сиёсатида асосий солиқ ставкаларини сақлаб қолиш, акциз солиғи, ер солиғи, жисмоний шахслардан олинадиган даромад солиғи ставкаларини Солиқ кодексига киритиш, 73 хил товарга акциз солиғини бекор қилиш, экспорт қилувчиларни қўллаб-қувватлаш ва бошқа чоралар кўзда тутилгани тўғрисида хабар берилганди.
Изоҳ (0)