1980 йилларнинг охирларида Диего Марадонани бутун дунё танирди. Аргентина терма жамоаси 1986 йилги мундиалда ғолиб чиққанди, Диего эса ушбу турнирнинг энг яхши ўйинчисига айланганди, айниқса, унинг Англия дарвозасига киритган иккита тўпи мухлисларнинг қалбидан ўзгача жой олганди. Бу голлар футбол тарихидаги дурдона асарлар ҳисобланади. Улардан бири ўша машҳур қўл зарбаси бўлса, иккинчиси Марадонанинг олти инглизни доғда қолдириб, бўш дарвозани ишғол этгани эди. Аргентиналик «Наполи»да ҳам ўзгача шижоат кўрсатарди: 1987 йилда скудетто, 1989 йилда эса УЕФА Кубогини қўлга киритганди.
Агар Марадона «Олтин тўп»ни қўлга киритиши мумкин бўлганида, албатта, уни ўзиники қиларди. Бироқ 1995 йилгача қоидалар европалик бўлмаганларни мукофотлашни тақиқлаган эди. 1989 йилда Американинг International Management Group (IMG) спорт агентлиги тадқиқот ўтказиб, Диегонинг сайёрадаги энг машҳур одам эканлигини аниқлади. Ҳатто 1986 йилги Жаҳон Кубогидан олдин ҳам Марадонани АҚШда жуда яхши билишарди.
Худди шу 1989 йилда IMG вакиллари Марадонага таклиф билан чиқиб, аргентиналик футболчининг АҚШда бўлиб ўтадиган 1994 йилги Жаҳон Чемпионатининг юзига айланиши кераклигини айтади. Медиа ҳуқуқлар учун футболчига 100 миллион доллар таклиф қилинади. Бу ҳали ҳаммаси эмасди, реклама тадбирларида қатнашгани учун ҳам Марадона яна алоҳида ҳақ олиши мумкин эди.
Аммо шартномада бир банд бўлиб, унда Марадонанинг АҚШ фуқаролигини олиши кераклиги кўрсатилганди. IMG’дагилар эса улар «америкалик Марадона» билан рекламалар рейтинги осмонга учишига ишончи комил эди. Ҳатто АҚШнинг ўша пайтдаги давлат котиби Ҳенри Киссинжернинг шахсан ўзи футболчига қўнғироқ қилиб, барча солиқ мажбуриятларидан халос этишни ваъда берган. Бироқ мағрур ва ватанпарвар Диего буни рад этди.
«Улар мендан америкалик бўлишимни сўради. Америка! Ҳа, менга самовий пуллар таклиф қилинди – аммо фуқаролик-чи? Аргентиналик бўлиш бахти ҳеч қандай қийматга сотилмайди», – деганди Марадона ушбу ҳолатга изоҳ берар экан.
Бундан ташқари, Марадона шундоқ ҳам жуда яхши пул топарди: «Наполи» билан тузилган янги шартномага кўра, у йилига 5 миллион доллар, шунингдек, медиа ҳуқуқлари учун яна қўшимча 2,5 миллион оларди. Шунингдек, Диего RAI телеканали билан йилига 3 миллион долларлик, Япониянинг Hitachi концерни билан эса 5 миллионлик шартномалари бор эди. Концерн Марадона номи билан спорт кийимларини ишлаб чиқарарди. Бундан ташқари, Марадона бир қанча кофе ичимликлари, пиво ва McDonald’s рекламаларидан ҳам яхшигина даромад кўрарди.
«Биз сериаллар, теледастурлар тайёрлардик, мактаб ўқувчилари учун аксессуарлар ишлаб чиқардик. Хуллас, кўнглимиз тусаган ишни қилардик. Ўша пайтда менда муаммо бўлмаган ягона соҳа, бу пуллар эди», – деганди Диего Армандо Марадона.
Изоҳ (0)