1980-yillarning oxirlarida Diyego Maradonani butun dunyo tanirdi. Argentina terma jamoasi 1986-yilgi mundialda g‘olib chiqqandi, Diyego esa ushbu turnirning eng yaxshi o‘yinchisiga aylangandi, ayniqsa, uning Angliya darvozasiga kiritgan ikkita to‘pi muxlislarning qalbidan o‘zgacha joy olgandi. Bu gollar futbol tarixidagi durdona asarlar hisoblanadi. Ulardan biri o‘sha mashhur qo‘l zarbasi bo‘lsa, ikkinchisi Maradonaning olti inglizni dog‘da qoldirib, bo‘sh darvozani ishg‘ol etgani edi. Argentinalik “Napoli”da ham o‘zgacha shijoat ko‘rsatardi: 1987-yilda skudetto, 1989-yilda esa UEFA Kubogini qo‘lga kiritgandi.
Agar Maradona “Oltin to‘p”ni qo‘lga kiritishi mumkin bo‘lganida, albatta, uni o‘ziniki qilardi. Biroq 1995-yilgacha qoidalar yevropalik bo‘lmaganlarni mukofotlashni taqiqlagan edi. 1989-yilda Amerikaning International Management Group (IMG) sport agentligi tadqiqot o‘tkazib, Diyegoning sayyoradagi eng mashhur odam ekanligini aniqladi. Hatto 1986-yilgi Jahon Kubogidan oldin ham Maradonani AQShda juda yaxshi bilishardi.
Xuddi shu 1989-yilda IMG vakillari Maradonaga taklif bilan chiqib, argentinalik futbolchining AQShda bo‘lib o‘tadigan 1994-yilgi Jahon Chempionatining yuziga aylanishi kerakligini aytadi. Media huquqlar uchun futbolchiga 100 million dollar taklif qilinadi. Bu hali hammasi emasdi, reklama tadbirlarida qatnashgani uchun ham Maradona yana alohida haq olishi mumkin edi.
Ammo shartnomada bir band bo‘lib, unda Maradonaning AQSh fuqaroligini olishi kerakligi ko‘rsatilgandi. IMG’dagilar esa ular “amerikalik Maradona” bilan reklamalar reytingi osmonga uchishiga ishonchi komil edi. Hatto AQShning o‘sha paytdagi davlat kotibi Henri Kissinjerning shaxsan o‘zi futbolchiga qo‘ng‘iroq qilib, barcha soliq majburiyatlaridan xalos etishni va’da bergan. Biroq mag‘rur va vatanparvar Diyego buni rad etdi.
“Ular mendan amerikalik bo‘lishimni so‘radi. Amerika! Ha, menga samoviy pullar taklif qilindi – ammo fuqarolik-chi? Argentinalik bo‘lish baxti hech qanday qiymatga sotilmaydi”, – degandi Maradona ushbu holatga izoh berar ekan.
Bundan tashqari, Maradona shundoq ham juda yaxshi pul topardi: “Napoli” bilan tuzilgan yangi shartnomaga ko‘ra, u yiliga 5 million dollar, shuningdek, media huquqlari uchun yana qo‘shimcha 2,5 million olardi. Shuningdek, Diyego RAI telekanali bilan yiliga 3 million dollarlik, Yaponiyaning Hitachi konserni bilan esa 5 millionlik shartnomalari bor edi. Konsern Maradona nomi bilan sport kiyimlarini ishlab chiqarardi. Bundan tashqari, Maradona bir qancha kofe ichimliklari, pivo va McDonald’s reklamalaridan ham yaxshigina daromad ko‘rardi.
“Biz seriallar, teledasturlar tayyorlardik, maktab o‘quvchilari uchun aksessuarlar ishlab chiqardik. Xullas, ko‘nglimiz tusagan ishni qilardik. O‘sha paytda menda muammo bo‘lmagan yagona soha, bu pullar edi”, – degandi Diyego Armando Maradona.
Izoh (0)