Нарпай туман ҳокимлигида халқ депутатлари туман кенгашининг навбатдан ташқари сессиясида туман ҳокими Ботир Жабборов лавозимидан озод этилди. Бу ҳақда Самарқанд вилояти ҳокимлиги ахборот хизмати хабар берди.

Фото: Самарқанд вилояти ҳокимлиги

Маълум қилинишича, 21 ноябрь куни ўтказилаётган сессия кун тартибида ташкилий масала кўрилмоқда. Ботир Жабборов бошқа ишга ўтганлиги муносабати билан туман ҳокими лавозимидан озод этилган.

Шу сабабли депутатлар томонидан туман ҳокими вазифасини вақтинча бажарувчи этиб Шерзод Раҳмонов номзоди тасдиқланган.

Маълумот учун, Ботир Жабборов 2017 йилдан буён Самарқанд вилояти Нарпай тумани ҳокими сифатида ишлаб келаётганди. Аввалроқ туман ҳокимлиги 398 миллион сўмга Trailblazer сотиб олгани маълум бўлганди.

Эслатиб ўтамиз, ноябрь ойининг ўзида республиканинг қатор туман ва шаҳарларига янги ҳокимлар тайинланди. Хусусан, Қорақалпоғистоннинг Қораўзак ва Чимбой туманига, Нукус шаҳрига, Денов туманига, Навоий вилоятининг Ғозғон шаҳри, Сирдарё вилоятининг Мирзаобод туманига янги ҳокимлар тайинланган.