Президент Шавкат Мирзиёевнинг Қашқадарё вилоятига ташрифи чоғида фаолияти танқид қилинган сув хўжалиги вазири Шавкат Ҳамраевнинг матбуот котиби «Дарё»га мурожаат қилиб, вазир 2020 йил 17 ноябрь куни Қашқадарёнинг Нишон туманида журналистлар билан мулоқот қилиб, танқиддан кейинги хулосаси ҳақида гапириб бермоқчилигини маълум қилди.
Вазирлик ахборот хизмати таклифига кўра, «Дарё» мухбири Нишон туманида бўлди.
Вазир айтилган манзилга кечикиб келгани етмагандек, нафақат ходимларига, суҳбатга таклиф қилинган журналистларга ҳам қўпол муносабатда бўлиб, атрофдагиларини тилга олиб бўлмас сўзлар билан ҳақоратлаган. Энг ёмони, саволларга ҳам аниқ жавоб беришдан тийилиб, гапни олиб қочган.
ОАВ вакиллари билан суҳбат қилиш ташаббуси билан чиққан вазир «Дарё» мухбирининг «Вазирлик Қашқадарёда сув сарфи кўплигини, Президент танқидига қадар ҳам билганмиди? Агар билган бўлса, қандай муносабат билдирган?», деган саволига вазирлик билганини, аммо тайинли иш қилмаганини айтган.
«Ўзимиз буни аввалдан билгандик ва доим айтиб келганмиз, — дейди вилоятда сув сарфи кўплигини аввалдан билганини маълум қилган вазир. — Биз бир йил олдин ишдан кетган ёши катта ҳавза бошқармаси бошлиғини дирекцияга раҳбар қилиб қўйгандик. Президентимиз ёш кадрларни ишга олиш керак деб буни ҳам танқид қилди. Аслида бир вилоят иккинчисига ўхшамаганидек, икки туман ҳам бир-бирига ўхшамаслиги мумкин. Лекин бир ҳолатни инобатга олиш керакки, Фарғона вилоятининг туманларида илгари сув сарфи кўп бўлган, энди камайди. Шунингдек, Қашқадарёда ер эгалари ирригация ва мелиорацияга маблағ сарфламайди. Фақат бер деб туради. Шу сабаб бундай ҳолат юзага келган. Мана шу ҳолатларни кўриб, агроинспекция билан бирга жарималар қилганмиз, баъзиларини прокуратурага берганмиз, баъзиларига эса сувни ёпиб бермай қўйганмиз. Лекин бу натижа бермаган», — деди сув хўжалиги вазири Шавкат Ҳамраев.
Эслатиб ўтамиз, Президент Шавкат Мирзиёев Қашқадарёга ташрифи давомида вилоятдаги экинларни суғоришга 20-25 фоиз кўп сув сарфланганини айтиб, сув хўжалиги вазири Шавкат Ҳамраев жамоасини танқид қилганди. «Сув хўжалигининг на бирорта раҳбари бор, на ўз устида ишлаши бор, жаноб Ҳамраев, на фикри. Юрибсан бу ноинсофлар билан сув хўжалигига катта-катта бинолар қуриб. Умринг узоқ бўлмайди, агар Қашқадарёда Қорақалпоғистонда айтган нарсанг бўлмаса. Менга қоровул бўладиган вазир керак эмас», деганди.