Ирландия соғлиқни сақлаш вазирлиги коронавирус инфекциясини чақирувчи SARS-CoV-2 вирусининг мутациялашуви эҳтимолини истисно қилиш учун қоракўзан (норка)ларни йўқ қилиб ташлашни тавсия этди, деб ёзади «РБК».

Фото: EPA

Вазирлик хабарида айтилишича, тестдан ўтказиш чоғида қоракўзанларнинг COVID-19’га чалиниши билан боғлиқ бирорта ҳам ҳолат аниқланмаган, аммо пандемия шароитида бу ҳайвонларни боқиш «доимий равишда хавф туғдиради».

Ирландияда жами учта қоракўзан фермаси бўлиб, улар Лииш, Керри ва Донегол графликларида жойлашган. РТЕ радиостанцияси маълумотларига қараганда, жониворларни йўқ қилиш ҳақидаги қарор ижросини яқин орада амалга ошириш режалари йўқ, аммо фермалар эгаларига соғлиқни Сақлаш вазирлиги тегишли огоҳлантириш берган.

Фермерлар фикрича, ҳукумат «ҳеч қандай илмий ёки юридик асосларни тақдим этмаган ҳолда» соғлом жониворларни йўқ қилмоқчи, бу қарор эса ҳайвонотчилик хўжаликлари эгаларини яшаш учун маблағсиз қолдиради. «Ирландия ҳукумати Данияда яқинда қабул қилинган, фермалардаги барча ҳайвонларни йўқ қилиш ҳақидаги қарорга таянмоқда, лекин бу қарор фермаларда касалланганлар сони тезлик билан ўсишига асосланганини улар назардан четда қолдирмоқда», — деди улар.

Ирландия ҳукумати дастурига аллақачон мамлакатда қоракўзанлар етиштиришни босқичма-босқич тўхтатиш ҳақидаги банд киритилган. Бироқ қабул қилинган буюртмаларни бажаришлари учун фермерларга ўлдирилган жониворлардан мўйналарни шилиб олишга рухсат берилиши мумкин, дейилади радиостанция хабарида.

4 ноябрь куни Дания ҳукумати ҳайвонларда коронавирус инфекциясини келтириб чиқарадиган SARS-CoV-2 вируси мутациясига учраганидан кейин мамлакатдаги барча фермер хўжаликларида қоракўзанлар йўқ қилинишини маълум қилди. Ушбу вирус штаммлари организмнинг коронавирусга қарши антитанани ишлаб чиқариш қобилиятини пасайтиради, бу эса келажакдаги вакциналар самарадорлигини назарий жиҳатдан пасайтириши мумкин.

10 ноябрь куни Дания ҳукумати фермерлардан касал ва соғлом ҳолатдаги барча қоракўзанларни ўлдиришни талаб қилиш учун қонуний асосга эга эмаслигини тан олди. Ҳукумат фақат касалланган фермаларда қоракўзанларни ўлдиришни талаб қилиши мумкинлигини айтди. Ўша куни Дания ҳукумати мамлакатдаги қоракўзанларни йўқ қилиш тўғрисидаги қарорини қўллаб-қувватловчи қонун лойиҳасини парламентга тақдим этди.

Даниядаги фермаларда коронавирус билан касалланган барча қоракўзанлар йўқ қилиниши ортидан мамлакат озиқ-овқат, қишлоқ хўжалиги ва балиқ хўжалиги вазири Могенс Йенсен ўз лавозимини тарк этишини эълон қилди. Аввалроқ, у баъзи фермер хўжаликларида ҳайвонларда коронавирус мутацияси аниқланганлиги сабабли мамлакатда етиштирилган қоракўзанларни йўқ қилиш тўғрисидаги қарор нотўғри бўлганлигини тан олганди.

Жаҳон соғлиқни сақлаш ташкилоти (ЖССТ) маълум қилишича, Даниядан ташқари, Испания, Италия, АҚШ, Нидерландия ва Швецияда ҳам қоракўзанлар коронавирус билан касаллангани аниқланган.