Британия ички ишлар вазири қўл остидаги ходимлари устидан кулишда айбланди

Буюк Британия ички ишлар вазири Прити Пател ахлоқ кодексини бузган ва вазирлар маҳкамаси аъзоларига қўйиладиган стандартларга риоя қилмаган. Британия ҳукумати олиб борган текширув шундай натижа берди, деб ёзади «РБК» The Times’га таяниб.

Вазирларга хос стандартлар бўйича маслаҳатчи Алекс Аллан раҳбарлиги остидаги текширув ОАВларда Пателнинг иш жараёнида ўз қўли остидагиларни қўрқитиши, камситиши ва асоссиз айбситиши ҳақида айбловлар пайдо бўлгач бошланган. Хусусан, баён қилинган бир воқеада айтилишича, четга мол чиқариб кетадиган авиарейснинг учишига йўл қўймаслик учун туни билан ишлаган ИИВ ходимларидан бири вазир билан суҳбатдан кейин ҳушини йўқотган.

Пателга нисбатан айбловлар оқибатида ИИВ мунтазам котиби Филип Рутнем истеъфога чиқарилди, кейинроқ у асоссиз ишдан бўшатилиши юзасидан ҳукуматни судга берди.

Алекс Алланнинг ҳисоботида айтилишича, Пателнинг хатти-ҳаракатлари таҳқирлаш деган таърифга мос тушади.

Таъкидланишича, 20 ноябрь куни бош вазир Борис Жонсон ички ишлар вазирини ҳимоя қилиб нутқ сўзлайди, унинг ўзи эса «олий хулқ стандартлари»ни бузганлиги учун узр сўрайди. Қайд этилишича, ҳукумат раҳбари вазирни истеъфога чиқаришга чақирмайди, уни оқлаш сифатида эса Пателнинг хатти-ҳаракатлари қасддан бўлмаганини айтади. Бош вазир, шунингдек, ички ишлар вазирининг қўл остидаги ходимларни буларнинг барчаси жамоатга ошкор бўлгунига қадар ўз айбловларини айтмагани учун танқид қилиб гапирмоқчи.

The Times суҳбатлашган экспертлар айтишича, Жонсоннинг Пателни оқлашга уринишлари унинг обрўсига путур етказиши мумкин, чунки бош вазир вазирлар кодексига риоя қилиш бўйича ҳакам бўлиб хизмат қилади.

2020 йил ёзида Opium тадқиқот маркази Жонсоннинг аҳоли томонидан қўллаб-қувватланиши рейтинги рекорд даражада пасайиб, 37 фоизни ташкил қилганини маълум қилган эди. Апрель ўрталаридан буён у 17 фоизга пасайган.

Бош вазир рейтингининг тушишини тадқиқот муаллифлари аҳолининг коронавирус пандемияси даврида ҳукуматнинг хатти-ҳаракатларидан норозилигига боғламоқда. Сўровда қатнашган британияликларнинг ярми ҳукумат коронавирус келтириб чиқарган инқирозга суст муносабат кўрсатди, деб ҳисоблайди.