Фото: «Темур дарвозаси» бўйлаб ҳаракатланаётган дизель-поезд

Facebook’даги Tashkent Retrospective гуруҳида «Темур дарвозаси» ўтган темир йўл бўйлаб ҳаракатланаётган дизель-поезднинг сурати ва унга оид маълумотлар пайдо бўлди.

Маълум қилинишича, ушбу сурат 1945 йилда олинган бўлиб, унда «Розария» дизель-поездининг «Темур дарвозаси»да синовдан ўтказилаётгани тасвирланган. Сурат муаллифи номаълум.

Поезднинг олд қисмида СССР таркибига кирганидан сўнг, ёпиштирилган беш қиррали қизил юлдуз йўқ.

Маълумотларга кўра, ДП дизель-поездлари — Венгрияга Ганс заводи томонидан 1940, 1945—1946 йиллар давомида қурилган дизель-поездлар сирасига кириб, у ерда Аргентина давлат темир йўллари учун поездлар йиғилган.

Таъкидланишича, ҳарбий ҳаракатлар сабаб поезд буюртмачига етказилмаган ва 1945 йилда уни Совет Иттифоқига репарацион етказмалар ҳисобидан юборишга қарор қилинган. Дизель-поезднинг конструксион маълумотлари 1938 йилдан бошлаб қурилган шу турдаги дизель-поездлар оиласининг ривожланишига хизмат қилган. 1946 йилдан бошлаб дизель-поездлар Кавказортига, Оржоникидзе, Ўрта Осиё ва Тошкент темир йўлларига эксплуатация қилинган. 1949 йилда дизель-поездлар Литва темир йўли паркига топширилган бўлиб, у ерда 1950 йиллар охирига қадар ҳаракатланган ва шундан сўнг фойдаланишдан олинган. Ҳозирга қадар ДП сериясига кирувчи бу каби поездларнинг бирортаси сақланиб қолмаган.