Россияда коронавирусга қарши ишлаб чиқилган «Sputnik V» вакцинаси клиник синовлари учинчи босқичининг оралиқ таҳлил натижалари унинг самарадорлиги 92 фоизни ташкил этишини кўрсатди. Meduza’нинг ёзишича, бу ҳақда вакцинанинг Twitter’даги саҳифасида маълум қилинган.
Хабарда айтилишича, самарадорликни бундай баҳолаш плацебо ва вакцина олган кўнгиллилар ўртасида тарқатилган COVID-19’нинг тасдиқланган 20 та ҳолатини таҳлил қилиш асосида келиб чиққан.
Шунингдек, вакцина яратувчиларининг фикрига кўра, 90 фоиздан юқори самарадорлик вакцинани клиник синовлардан ташқарида олган 10 минг нафар кўнгиллини кузатиш натижалари билан ҳам тасдиқланган.
«Sputnik V» яратувчилари улар коронавирусга қарши вакцинани дунёда биринчи бўлиб ишлаб чиқиб, уни рўйхатдан ўтказишга муваффақ бўлганини таъкидламоқда.
Эслатиб ўтамиз, АҚШнинг Pfizer компанияси томонидан яратилган коронавирусга қарши вакцина 90 фоиз самарадорлик кўрсатгани ҳақида хабар берилган эди. Компания томонидан қайд этилишича, вакцинанинг самарали таъсири эмлаш бошланганидан 28 кундан кейин сезилади — бу вақт ичида беморга вакцинанинг иккита дозаси жўнатилади. Тадқиқотда жами 43 538 нафар кўнгилли иштирок этган. Уларнинг ҳеч бирида жиддий иккиламчи таъсир кузатилмаган.
«Sputnik» вакцинасини ишлаб чиққан Россиянинг Гамалея номидаги марказ раҳбари Александр Гринсбург Pfizer препаратининг синов натижаларига муносабат билдириб, «дунёда қанча кўп вакцина бўлса, одамлар шунча яхши ҳимояланади», деб айтган.
Россия Соғлиқни сақлаш вазирлигининг терапия ва умумий тиббий амалиёт бўйича бош мутахассиси Оксана Драпкина коронавирус инфекциясига қарши яна бир самарали вакцина пайдо бўлишини «хушхабар» деб атади. У Россиянинг «Sputnik V» препарати самарадорлиги ҳам 90 фоиздан юқорилигини билдирган.