Энергетика вазири ўринбосари, куз-қиш мавсумига тайёргарлик штаби раиси ўринбосари Акмал Эшонқулов Қашқадарё вилоятининг Деҳқонобод туманида бўлиб, аҳолининг куз-қиш мавсумига тайёргарлик жараёнлари билан танишган ва масъулларга мавсумда аввало аҳолининг табиий газга бўлган эҳтиёжини қондириш лозимлигини айтган. Бу ҳақда «Дарё» мухбири хабар берди.
Халқ депутатлари Деҳқонобод туман кенгашининг навбатдаги сессиясида сўз олган вазир ўринбосари қишда табиий газ биринчи навбатда аҳолига етказиб берилиши кераклигини таъкидлаган. «Вазирлар Маҳкамасининг махсус қарорида шу ҳақда белгилаб қўйилган. Аҳолида газ босими пасайиб кетдими, демак, биз улгуржи истеъмолчиларни узишимиз керак. Уларни газ тармоғидан ўчириб, аҳолига йўналтиришимиз лозим бўлади. Шу масалаларга жудаям эътиборли бўлишимиз лозим», — деган у.
Вазир ўринбосари, шунингдек, улгуржи газ истеъмолчилари қачон газ тармоғидан узилиши мумкинлигига ҳам тўхталиб ўтган.
«Биз ишлаб чиқарувчиларни ёки бошқа иш ўрни яратган корхоналарни тушунамиз, албатта. Бироқ уларда муқобил ёқилғи тури бўлиши керак. Биз учун энг муҳими — миллатимиз соғлиғи», — деди вазир ўринбосари Акмал Эшонқулов.
Деҳқонобод туман ҳокими Зоир Алиқуловнинг маълумот беришича, туман аҳолисининг қиш мавсумини кўнгилдагидек ўтказиши учун табиий газ етиб бормаган ҳудудларга 1200 тонна кўмир етказиб бериш бошланган.
«Дастлабки 80 тонна кўмир шахсан вазир ўринбосари Акмал Эшонқулов ташаббуси ва ҳокимлик ҳамкорлигида аҳолига етказиб берилди. Сифатли кўмирнинг тоннаси 300 минг 300 сўмдан сотилди. Эндиликда туманда ҳам кўмир шохобчаси ташкил этилиб, қишга қадар яна 1120 тонна кўмир олиб келинади ва аҳолига тарқатилади», — деди Зоир Алиқулов.
Қўшимча қилинишича, шу куни туманнинг табиий газ етиб бормаган ҳудудларига суюлтирилган газ баллонлар ҳам етказиб берилган.
Эслатиб ўтамиз, аввалроқ Андижонда газ-заправкалар соат 16:00 гача ишлаш режимига ўтказилаётгани, сабаб сифатида вилоятга етказилаётган газ босими пасайгани айтилганди.
Изоҳ (0)