Нью-Ҳемпшир штатидаги Диксвилл-Нотч шаҳарчасида АҚШ президентлигига ўтказилган сайлов натижалари эълон қилинди. Сайловчиларнинг барча бешта овозини Демократлар партиясидан бўлган номзод, АҚШнинг собиқ вице-президенти Жо Байден олган, деб хабар беради CNN.

Фото: Global News

Диксвилл-Нотч сайлов натижаларини эълон қилган АҚШдаги биринчи шаҳарлардан бирига айланди. Шаҳардаги сайлов участкаси ярим тундан сўнг очилган. Овоз бериш имкониятига эга бўлган барча бир неча дақиқа ичида ўз ҳуқуқидан фойдаланган.

Диксвилл-Нотчга қўшни бўлган Миллсфильд шаҳрида ҳам сайлов участкалари ярим тунда очилган ва уларнинг ҳисоб-китоби бўйича, Республикачилар партиясидан бўлган номзод, АҚШнинг амалдаги президенти Дональд Трамп ғолибликни қўлга киритган. Унга сайловчиларнинг 16 нафари, Байденга — беш нафари овоз берган.

CNN’нинг таъкидлашича, Диксвилл-Нотч доим журналистлар эътиборини ўзига тортиб келади, бироқ шаҳардаги сайлов натижалари одатда АҚШнинг навбатдаги президенти ким бўлишини олдиндан айтиш имконини бермайди. 2016 йилда ҳам ушбу шаҳарда Ҳиллари Клинтон ғолиб бўлганди, бироқ сайловчилар коллегияси якуний ғолибликни Трампга берган.

Сўнгги маълумотларга кўра, ҳозирга қадар АҚШдаги сайловчиларнинг 99 миллиондан ортиғи президентлик сайловларида қатнашиб улгурган. Бу умумий овоз берувчилар сонининг 40 фоизини ташкил этади.