Ўзбекистон ва Тожикистон октябрь ойи ўрталарида Душанбе ва Тошкент ўртасида авиақатновларни 1 ноябрдан тиклаш масаласини муҳокама қилганди, кейинчалик бу муддат 1 декабргача деб белгиланди. Энди эса янги муддат — 2021 йил 1 январь кўриб чиқилмоқда, деб хабар бермоқда Asia-Plus, Тожикистон ҳукуматидаги манбаларига таяниб.
Қайд этилишича, ҳар иккала давлатдаги коронавирус пандемияси туфайли юзага келган мураккаб эпидемиологик вазият ҳукуматга бу масалада тезкор ва якуний қарорга келишга имкон бермаяпти.
Мавзуга доир: Тожикистон Душанбе ва Тошкент ўртасидаги авиақатновларни тиклаш масаласини кўриб чиқмоқда
«Тегишли қарор ўзбекистонлик ҳамкасбларда ҳам бор, лекин авиаалоқалар бошланиши аниқ санаси ҳозирча номаълум. Парвозлардан аввал барча жабҳалар — қайси авиакомпаниялар учади, қандай жадвал бўйича, пандемия билан боғлиқ масалаларни аниқлаштириш лозим», — дейилади хабарда.
Шунингдек, ушбу ва бошқа масалаларни муҳокама қилиш учун яқин кунларда Тожикистон ва Ўзбекистон авиация раҳбарлари онлайн учрашуви ташкил этилиши, унда Тошкент—Душанбе—Тошкент йўналишида дастлабки рейс санаси ва жадвали тасдиқланиши таъкидланган.
Эслатиб ўтамиз, Ўзбекистон 1 октябрдан бошлаб барча давлатлар, жумладан, Тожикистон учун чегарларини очган: бунда мамлакатлар чекловларга қараб гуруҳларга ажратилган.
Изоҳ (0)