Халқ таълими вазири: «Кейинги кириш имтиҳонларида ўзбек тили бўйича грамматика эмас, тўртта кўникма тест қилинади»

Ўзбекистон президентининг «Мамлакатимиз таълим-тарбия тизимини янада такомиллаштириш, илм-фан соҳаси ривожини жадаллаштиришга оид қўшимча чора-тадбирлар тўғрисида»ги фармони лойиҳаси юзасидан 24 октябрь куни АОКАда матбуот анжумани ўтказилди. Унда Халқ таълими вазири Шерзод Шерматов мактаб ўқувчиларига ўзбек тили бўйича фақат грамматика ўқитилаётгани ва бу борада кутилаётган янгилик тўғрисида сўз юритди, дея хабар бермоқда «Дарё» мухбири.

«Ўзбек тилини ўқитишда биздаб асосан, грамматикага эътибор берилган. Биз ҳозирда буни умуман янгича йўналишда амалга оширяпмиз. Аслида, тил ўрганиш тўртта кўникмага боғлиқ. Инглиз тилига агар TOEFL топширсангиз, тўртта кўникма ўрганилади, улар грамматикани кўрмайди. Шунинг учун Республика таълим марказига ҳам бу вазифа қўйилган. Яъни грамматикадан қочиб, тўртта кўникма – ўзбек тилида ўқиб, тушуниш, эшитиб тушуниш, ифодали гапириш ва ёзиш. Афсуски, мана шу тўртта кўникма четда қолиб, болаларимизга фақат грамматика ўқитиляпти.

Оддий бир мисол. Олдинги йили Сирдарёда ўқитувчиларнинг ўзини ҳам тест қилгандик. Аксарият педагогларнинг ўзи ҳам ўзбек тили грамматикаси бўйича ДТМ тестларини ечолгани йўқ. Тасаввур қилинг, болаларни қийнаб, грамматикага тайёрлаяпмиз. Шунинг учун бу бўйича ҳам фармонда вазифа қўйилган. Кейинги кириш имтиҳонларида ўзбек тили бўйича тест қилинганида ҳам грамматикани эмас, тўртта кўникма тест қилинади. Инглиз тилида IELTS’га тайёрлангандек кейинчалик болаларимиз ҳам тўртта кўникмага тайёрланишга ҳаракат қилса, албатта, тил билиш даражаси ҳам ошиб боради», — деди Шерматов.