Коронавирусга қарши кураш штаби аъзоси COVID-19’га чалинган одам тузалганидан кейин қачон ювиниши мумкинлигини айтди

Коронавирус билан касалланиб, шифохонада стационар шароитда даволаниб чиққан кишилар бир неча кун уй шароитига кўникиши ва ундан сўнг ювиниши мумкин бўлади. Бу ҳақда Ўзбекистон Соғлиқни сақлаш вазирлиги ҳузуридаги Коронавирусга қарши кураш штаби аъзоси Наргиза Нуруллаева маълум қилди.

Штаб аъзосининг айтишича, келиб чиқиш сабаблари турлича бўлган пневмониялардан кейин тикланиш даври бир мунча узоқ муддат талаб қилади. Тикланиш даври муддати ҳар бир беморда турлича бўлиб, бу беморнинг ёшига, организмининг умумий ҳолатига ва ёндош сурункали касалликлар мавжудлигига боғлиқ. Стационар даводан сўнг бир неча кун уй шароитига кўникиш ва ундан сўнг ювиниш мумкин бўлади.

Унинг таъкидлашича, ҳозирги кунда беморларга дезинфекцияловчи салфеткалар ёки иссиқ сувда намланган сочиқ билан артиниш тавсия этилади. Бу ҳолатда хонада ойналар ёпилган бўлиши, яъни елвизак бўлмаслиги лозим.