Ўзбекистондаги Миллий рейтингнинг кучли учлигига кирган олий таълим муассасаларига академик ва молиявий мустақиллик берилади. Бу ҳақда Таълим сифатини назорат қилиш давлат инспекцияси бошлиғи Улуғбек Тошкенбоев АОКАда ўтказилган матбуот анжуманида маълум қилди.
Улуғбек Тошкенбоевнинг сўзларига кўра, олий таълим муассасаларининг миллий рейтингида сўнгги 5 йил давомида доимий равишда биринчи 3 та ўриндан бирини эгаллаган ОТМларга олий маълумотли кадрлар тайёрлаш бўйича академик ва молиявий мустақиллик берилади.
Академик ва молиявий мустақилликни белгилашда эса халқаро таъриф ва стандартларга асосланилади, яъни мустақиллик мезонлари Европа университетлари ассоциацияси стандартларига мувофиқ қабул қилиниши белгиланмоқда.
Эслатиб ўтамиз, Ўзбекистонда илк марта ОТМлар рейтинги 2018 йилда тузилганди. Вазирлар Маҳкамаси ҳузуридаги Таълим сифатини назорат қилиш давлат инспекцияси октябрь ўрталарида 2020 йил бўйича ОТМларнинг миллий рейтингини эълон қилди. Унга кўра, гуманитар ва иқтисодий соҳада Ўзбекистон Миллий университети, Самарқанд давлат университети, Тошкент молия институти, Тошкент давлат ўзбек тили ва адабиёти университети етакчи ўринларни эгаллаган.
Изоҳ (0)