Кеча Ўзбекистон ҳудудига Уралдан совуқ ҳаво оқими кирди, деб ёзмоқда «Ўзгидромет».
Бутун республика ҳудуди бўйича булутлилик ортди, Фарғона водийси вилоятларида, тоғли ва тоғолди ҳудудларида ёмғир, баланд тоғли ҳудудларда қор ёғди. Тошкент ва Наманган вилояти тоғларида 2000 метрдан юқори зоналарда қор қоплами ҳосил бўлди. Ўтган иссиқ давр билан солиштирганда ҳаво ҳарорати 8-10 даражага пасайди.
23 октябрь куни Ўзбекистон ҳудуди совуқ ҳаво оқим таъсирида бўлади. Республика ҳудудининг катта қисмида ҳаво булутли бўлади, ёғингарчилик бўлмайди, фақат Фарғона водийсининг айрим жойларига ёмғир ёғади, тоғли ва тоғолди ҳудудларда айрим жойларга ёмғир, қор ёғади. Ҳарорат 13-18 даража атрофида бўлади.
24 октябрь куни ҳаво оқими шарққа томон силжийди. Ёғингарчилик эҳтимоли фақат республиканинг айрим тоғли ҳудудларидагина сақланиб туради. Мамлакат ҳудуди устида булутлилик сақланиб туриши ҳисобига шу куни ҳарорат ўзгармайди.
Якшанба куни жануби-ғарбий оқимлар ҳисобига совуқ ҳаво Ўзбекистон ҳудудидан чекинади. Бутун республика бўйича об-ҳаво кам булутли ва қуруқ бўлади. Кечаси ҳарорат 3-6 даража илиқ бўлади, кундузи 17-20 даражагача исийди, бундай ҳарорат меъёрий қийматлардан бироз паст.
Изоҳ (0)