Бахтсиз ҳодиса туфайли чиройини йўқотиб, қалб гўзаллиги билан бахт топган қизлар ҳикояси (фото)

Ушбу ҳикоя қаҳрамонлари билан даҳшатли фожиалар юз берган. Улардан бири оловда ёнган, яна бири душманлари томонидан сепилган кислота остида қолган. Гарчи улар ташқи кўриниши, чиройини йўқотган бўлса-да, қалб гўзаллигини сақлаб қолди. Натижада улар чинакам муҳаббатни топишга муваффақ бўлди.

Турия Питт

2011 йилда австралиялик Турия Питтнинг ҳаёти режа ва мақсадларга тўла эди. Питт университетни тамомлаб, кон муҳандислиги бўйича илмий даражани олган. Шунингдек, модель сифатида ишлаётган Турия севиклиси Майклга турмушга чиқиш тараддудида эди.

Майкл ва Питт мактабда танишган, бу пайтда уларнинг бири 17, иккинчиси 14 ёшда эди. Шундан буён улар бир-бирини тарк этмади. Турия Racing The Planet пойгасининг 100 километрлик марафонида қатнашишга қарор қилгунга қадар ҳаммаси жойида эди.

Афсуски, бахтсиз ҳодиса туфайли пойгада иштирок этаётганлар йўлини даҳшатли табиий офат – дашт ёнғини тўсиб қўйган. Турия эса бошқа ҳамкасблари қаторида офат марказида қолиб кетган.

Натижада Турия танасининг 64 фоизи куйишдан жароҳатланди, чап қўлида уч бармоғи қолди ва ўнг қўлида эса умуман бармоқсиз эди. Ҳатто шифокорлар унинг аҳволи оғирлигидан тирик қолишига шубҳаланган.

Турия шифохонада 2 йил даволанди, бу вақт ичида у 100 дан ортиқ қайта тикловчи операцияларни ўтказди. Аммо унинг аввалги ҳолатини қайтариш борасида бирор гап бўлиши мумкин эмасди.

Шу билан бирга Майкл Турияни ёлғиз қолдирмаслик учун ишдан бўшади, у полиция ходими эди ва икки йил мобайнида унинг ёнида бўлди. Қиз жонлантириш бўлимига ётқизилганда, Майкл унинг учун никоҳ узугини сотиб олди. Туриянинг одатдаги ҳаётга қайтиши учун Майкл унга жуда катта ёрдам берди. Турия қанчалар кучли бўлмасин, унинг янги танасига ҳамма эътибор берар ва бунга ўрганиш осон эмасди. Аммо ҳозирда Турия ўзини яхши ҳис қилмоқда.

Фожиа юз бериб ўтганидан сўнг ҳам Турия севимли машғулотини тарк этмади, у Сиднейдан Улуру шаҳрига велосипедда олти ойлик сафар уюштирди. Бундан ташқари, Турия шундай фожиага дуч келган одамларга ёрдам беришга тайёр.

Майкл турмуш ўртоғи ҳақида шундай дейди: «Турия одамларнинг унга ачинишини истамайди, у чиройли ва ажойиб қалб эгаси. У ҳамиша ўз ҳаётида яшашни хоҳлайди: сайр қилишни, океанни, фаолликни яхши кўради. Турия чиндан ҳам тасаввур қилиб бўлмайдиган даражада кучга эга. Биз, албатта, биргамиз. У ҳали ҳам ўша-ўша Турия, фақатгина териси бироз ўзгарган».

2015 йил 21 июлда жуфтлик ўзининг никоҳ тўйи ҳақидаги хабарни эълон қилди. 2017 йил декабрда уларнинг оиласида ўғил фарзанд дунёга келди.

Татьяна Воронина

Украинанинг Киев шаҳрида яшовчи Татьяна Воронина 18 ёшида даҳшатли фожиани бошдан кечирди. Воқеа Татьянанинг унга телбаларча ошиқ бўлган йигитнинг севгисини рад этишидан бошланган. Аммо ақлдан озган рашкчи йигит қасос олиш ниятида унинг юзига олтингугурт кислотасини сепиб юборди. Татьяна мўъжизавий тарзда омон қолди.

Татьяна 10 йил давомида даҳшатли чандиқлар билан яшашга мажбур бўлди. Бу орада ўтказилган 15 дан ортиқ қайта тиклаш операцияси унинг аввалги гўзаллигини қайтариб бермади. Баъзилари эса муваффақиятсиз тарзда тугаб, қизнинг аҳволини янада ёмонлаштирди.

2016 йил Татьяна Украинанинг «Менга гўзалликни қайтариб беринг» телевизион лойиҳасида иштирок этди ва унинг ташқи кўринишида ўзгаришлар юз бера бошлади. Албатта, унинг юзини бутунлай қайтариш мумкин эмасди, аммо муваффақиятли операциядан сўнг қизнинг ўзига ишончи ортди ва ҳаётга қайтишга куч топа олди.

Дастур намойишидан бир неча ой ўтиб, Татьяна ижтимоий тармоқда Андрей исмли йигит билан танишди. Йигитнинг қўллаб-қувватлашлари туфайли Татьяна ўзини янада яхши ҳис қила бошлади. Орадан 10 ой ўтиб жуфтлик оила қуришга қарор қилди.

Лалита Бен Банси

2012 йилда амакисиникига тўйга борган Лалита укаси ва амакисининг ўғли ўртасидаги тортишувга гувоҳ бўлади. Сўнгра уларнинг жанжалини тўхтатиш мақсадида юзига тарсаки тушириб, ажратиб қўяди. Орадан вақт ўтиб Лалита бу воқеани унутиб юборади. Аммо қасоскор амакивачча Лалитанинг тўйига 15 кун қолганида бир тарсаки учун унинг юзига кислота сепиб юборади.

Виждонсиз қариндошнинг қасоси туфайли янги ҳаёт остонасида турган келин 17 марта қайта тиклаш операцияларни ўтказишга тўғри келди. Афсуски, бу уринишлар қизнинг олдинги кўринишини қайтариб беролмади. Шунингдек, куёв ҳам унинг аянчли аҳволи туфайли уйланишдан воз кечди. Қиз эса ўз муаммолари қаршисида ёлғиз қолишга мажбур бўлди.

Ҳаётидан янгилик кутишни тўхтатиб қўйган Лалита энди ҳаммаси аввалгидек бўлмаслигига ишонган эди. Аммо тўсатдан адашиб терилган телефон рақами унинг оламида кескин бурилиш ясади. Терилган нотўғри рақамга Рави Шанкар Сингх исмли йигит жавоб берди ва суҳбат қизиқ кечганлиги туфайли муносабатлар илиқлаша бошлади.

Орадан кўп ўтмай  Лалита йигитга ўзи билан бўлиб ўтган воқеа ҳақида батафсил айтиб берди. (Ҳиндистонда йилига тахминан 1000 киши бу каби ҳужумларнинг қурбонига айланади). Аммо бу воқеа йигитни умуман ташвишлантирмади.

«Кўпгина жуфтликлар ташқи кўринишга қараб оила қуради, кейинчалик ажрашади. Менга эса Лалитанинг юзи аҳамиятсиз. Асосийси, у яхши инсон. Худо бизга умрбод барака беришини истайман», − дейди Рави. Уларнинг никоҳ тўйига кўплаб Болливуд юлдузлари ташриф буюрди.