Синалган 7 усул: Лабни уколсиз катталаштириш бўйича тавсиялар

Лаб каттароқ кўриниши ва рангидан кўнгил тўлиши учун гўзаллик уколларидан фойдаланиш шарт эмас. Қон айланишини яхшилаб, одатдагидан сезиларлироқ натижага эришиш мумкин бўлган тавсиялар билан бўлишамиз.

Тиш чўткаси ёрдамида

Чўткаси юмшоқ бўлган қуруқ тиш ювиш чўткасини олиб, қизиганини сезмагунингизча лабингиз бўйлаб ҳаракатлантиринг. Бунинг учун алоҳида янги чўткадан фойдаланиш тавсия қилинади. Тиш чўткаси билан массаж амалга оширилганидан кейин компресс қилиш керак: ментолли ёғга ботириб олинган салфеткани лабингиз устига 10 дақиқага қўйиб қўйинг.

Массаж ва компресслар

Массажни ҳар куни амалга ошириш керак, шундагина ижобий натижа кузатилади. Муз бўлаги солинган матони лабга қўйиб, ҳаракатлантиринг, муз қон циркуляциясини яхшилайди. Кейин контраст массаж қилиш керак: иссиқ сув билан ҳўлланган мато, ундан кейин бўлса муз бўлагини кетма-кетликда лабга қўйиш керак. Ҳар куни ётишдан аввал мазкур тавсияга амал қилинса, бир неча ҳафтадан кейин ўзгариш бўлганини пайқаш мумкин бўлади.

Скраб

Скрабдан мунтазам фойдаланиш эски қуриган терини тушириб янгиланишига сабабчи бўлади. Помада яхши суртилади ва лаб каттароқ кўринади. Тайёр скрабдан фойдаланиш ёки уй шароитида тайёрлаш ҳам мумкин. Бунинг учун қаҳва, шакар, сули ёрмасини кокос, зайтун ёки авокадо ёғи билан аралаштириш кифоя. Скрабни лабга суртиб, 5 дақиқадан кейин ювиб ташлаш керак. Кейин гигиеник помада ёки крем суртишни унутманг. Муолажани 10-12 кунда такрорлаб туриш тавсия қилинади.

Қиздирадиган маҳсулот ёки воситалардан фойдаланиш

Ялпиз ёғи, долчин (корица) ёки қалампирга зайтун ёки кокос ёғини қўшинг. Аралашмани лабингизга суртинг ва дискомфорт ҳис қилишингиз билан ювиб ташланг.

Машқлар бажариш орқали

Ёш ўтиши билан лаб ва лаб атрофи бурчагида ўзгаришлар кузатилади. Ажин тушишининг олдини олиш ва лаб шакли ўзгариб қолмаслиги учун бир қатор машқларни бажариш керак.

«Ўрдакча» машқи

Иккала қўлингизнинг биринчи ва иккинчи бармоғи билан лабнинг тепа ва пастки қисмини ушлаб, бирлаштиринг. Лабингизни олдинга ва орқага ҳаракатлантиринг. «У» ҳарфини талаффуз қилгандек ҳаракатга келиши керак. Машқни 20 марта такрорланг.

Машқ қилиш учун мўлжалланган стерил буюмни лабларингиз орасига қўйинг ва ўнгга ва чапга ҳаракатлантиринг. 20 сония давомида 15 марта такрорланг.

Макияж

Лаблар каттароқ туюлиши учун оч, ёрқин ва табиий ранглардан фойдаланинг. Янада кўпроқ натижага эришиш учун қуйидагиларга амал қилинг:

• Қалам ёрдамида контур чизинг.
• Хайлайтерни юқори лаб  бурмасига суртинг.
• Помада суртгандан кейин лабнинг ўртасига хайлайтер суртинг.

Блеск лабни шишириши учун унинг таркибида қалампир экстракти ёки ментол бўлиши керак. Уни суртгандан кейин қон циркуляцияси ўзгариб, лабда қизиш ёки музлагандек ҳис пайдо бўлади ва шишади. Аммо блескнинг ўзи билан чекланиш тавсия қилинмайди, юқоридаги тавсиялар кетма-кетлигига амал қилиш керак.