Ижтимоий тармоқларда Тошкент вилоятидаги Зангиота юқумли касалликлар шифохонасида электр таъминоти узилиб қолгани ҳақида хабарлар тарқалди.

Фото: Соғлиқни сақлаш вазирлиги

Хусусан, журналист Хуршид Далиевнинг ёзишича, COVID-19 марказида аҳвол ёмонлашиб, кислород концентраторига уланган беморларнинг кўпчилиги вафот этган.

«Ёмон хабар эшитдим. Кеча Зангиотада свет ўчибди. COVID марказида аҳвол ёмонлашибди. Кислород уланганларнинг кўпи бандалик қилибди. 300 дан ортиқ дейишди. Бу даҳшат», — дея ёзган журналист 12 октябрь куни ўзининг Twitter’даги саҳифасида.

Ўзбекистон Соғлиқни сақлаш вазирлиги мазкур хабарга муносабат билдирди. Маълум қилинишича, 2020 йилнинг 6 июлидан беморларни қабул қила бошлаган Зангиота юқумли касалликлар шифохонаси янги ва замонавий талабларга мослаб қурилган. «Кеча (11 октябрь — таҳр.) Зангиотадаги шифохонада электр энергияси узилмаган», — дейилади вазирлик хабарида.

ССВ томонидан маълум қилинишича, касалхонада бирорта ҳам ўлим қайд этилмаган. Шифохонада электр узлуксизлигини таъминлаш мақсадида 3 та дизель генератори ўрнатилган. «Барча шифокорлар коронавирус билан курашга жалб қилинган бир вақтда бундай бўлиши ақлга сиғмайди». — дейилади ССВ муносабатида.

Кейинроқ Хуршид Далиев Зангиотадаги касалхонада электр токи ўчиб қолгани ростлигини, бироқ 300 киши вафот этгани нотўғри маълумот эканлигини ёзган.

Соғлиқни сақлаш вазирлиги Зангиотадаги касалхонада 11 октябрь куни электр энергияси таъминотида узилиш бўлмаганини маълум қилган, бироқ ундан аввал мазкур муассасада электр таъминотнинг узилиши юз берган ёки юз бермаганлигига аниқлик киритмаган.

Эслатиб ўтамиз, 2020 йил 7 октябрь куни Гулистон шаҳридаги «Алпомиш» спорт мажмуасида ташкил этилган коронавирус беморларини саралаш ва тақсимлаш марказида портлаш юз берган, Фавқулодда вазиятлар вазирлиги портлаш мажмуадаги кислород баллони ёрилиши оқибатида содир бўлганини маълум қилганди. Портлаш юзасидан жиноят иши қўзғатилган ва ҳозирда тергов ҳаракатлари олиб борилмоқда. Портлаш кислород баллони ичидаги кислородга мой қолдиғининг аралашгани сабабли юз берган бўлиши мумкинлиги тахмин қилинмоқда.