Tojikistonda prezident saylovlarida ovoz berish uchun saylov uchastkalari ochildi, deb xabar beradi “RBK”. Ovoz berish 06:00 dan 20:00 gacha (Toshkent vaqti bilan bir xil) bo‘lib o‘tadi.
Mamlakat bo‘ylab 3414 ta saylov uchastkasi ochilgan bo‘lsa, Tojikistondan tashqarida yana 39 ta uchastka ishlaydi. Mamlakat Markaziy saylov komissiyasi ma’lumotlariga ko‘ra, jami 4,9 million saylovchi ro‘yxatga olingan.
Prezident lavozimi uchun besh nomzod kurashmoqda, ular orasida amaldagi prezident Emomali Rahmon ham bor. Saylovchilar ro‘yxatiga kiritilganlarning 50 foizdan ortig‘i qatnashgan taqdirda, saylovlar bo‘lib o‘tgan deb hisoblanadi. Ovozlarning yarmidan ko‘pini qo‘lga kiritgan nomzod g‘olib bo‘ladi.
Saylovlarni xalqaro kuzatuvchilar kuzatib boradi. Bunda gap YeXHT, MDH Parlamentlararo assambleyasi, MDH Ijroqo‘mi, ShHT, shuningdek, Rossiya va O‘zbekistondan borgan 122 nafar xalqaro kuzatuvchilar haqida bormoqda.
Eslatib o‘tamiz, Shavkat Mirziyoyev 5-oktabr kuni Tojikiston prezidenti Emomali Rahmon bilan telefon orqali muloqot qilib, bo‘lajak prezidentlik saylovlarida muvaffaqiyat tilagan edi.
Izoh (0)