Шавкат Мирзиёев 7 октябрь куни Россия президенти Владимир Путин билан телефон орқали мулоқот қилди, деб хабар бермоқда Президент матбуот хизмат. Суҳбат аввалида давлат раҳбари Россия етакчисини туғилган куни билан табриклаб, унга мустаҳкам соғлиқ, бахт-саодат ва муваффақият, Россия халқига эса тинчлик-осойишталик ва равнақ тилади.
Фото: Президент матбуот хизмати
Хабарда айтилишича, мулоқот чоғида Ўзбекистон—Россия стратегик шериклик ва иттифоқчилик муносабатларини янада мустаҳкамлашнинг долзарб масалалари кўриб чиқилди, халқаро ва минтақавий кун тартиби юзасидан фикр алмашилди. 2020 йил июль ойида Москва шаҳридаги учрашув чоғида эришилган келишувларга мувофиқ бўлажак олий даражадаги мулоқотларга тайёргарлик кўриш бўйича биргаликдаги фаол ишларни давом эттиришга алоҳида эътибор қаратилди.
Пандемия оқибатларига қарамай, ўзаро ташрифлар амалга оширилаётгани, Ўзбекистон ва Россиянинг етакчи компания ва корхоналари ўртасидаги инвестициявий ҳамкорлик кўлами ва товар айирбошлаш ҳажми кенгайиб бораётгани мамнуният билан қайд этилди. Таълим ва маданий алмашинувга доир муҳим дастурлар амалга оширилмоқда.
Шавкат Мирзиёев коронавирусга қарши курашишда кўрсатилган амалий ёрдам, жумладан, Россиядан врач ва мутахассисларнинг катта гуруҳи Ўзбекистонга жўнатилгани учун самимий миннатдорлик билдирди.
Давлат раҳбарлари икки мамлакат вазирлик ва идоралари даражасида, шу жумладан жорий ойда бўлиб ўтадиган Ҳукуматлараро комиссиянинг навбатдаги мажлиси доирасида яқиндан мувофиқлашув ва ҳамкорликни давом эттириш муҳимлигини таъкидлади. Бунда, аввало, кўп қиррали муносабатларнинг устувор дастур ва лойиҳаларини, бизнес ва ҳудудлар кооперациясини кучайтириш бўйича узоқ муддатли «йўл харитаси» тайёрлашни жадаллаштириш назарда тутилади.
Давлат раҳбарлари, шунингдек, минтақада юзага келаётган вазиятни муҳокама қилди, бўлажак тадбирлар режасини кўриб чиқди.
Аввалроқ Шавкат Мирзиёев Тожикистон президенти Эмомали Раҳмонни туғилган куни билан табриклаб, унга бўлажак президентлик сайловларида муваффақият тилагани, Германия президенти Франк Вальтер Штайнмайерни миллий байрам – Германия бирлиги куни билан, Жанубий Корея президенти Мун Чже Инни мамлакат ташкил топган кун ва Чусок байрами билан табриклаб, мактуб йўллагани хабар берилган эди.
