Олий ва ўрта махсус таълим вазирлигининг маълум қилишича, 2020/2021-ўқув йилига республика олий таълим муассасаларининг магистратура мутахассисликларига кириш имтиҳонлари натижалари тегишли олий таълим муассасаларининг расмий веб-сайтларида эълон қилинади.
Республика олий таълим муассасаларининг магистратура мутахассисликларига абитуриент сифатида ҳужжат топшириб, кириш имтиҳонларида (онлайн тест синовларида) иштирок этган абитуриентлар ўзларининг натижалари билан тегишли олий таълим муассасасининг расмий веб-сайти орқали 7 октябрь куни соат 17:00 дан бошлаб танишишлари мумкин.
Талабаликка тавсия этилган абитуриентлардан тегишли олий таълим муассасаларига мурожаат қилиш сўралган.
Эслатиб ўтамиз, ўқишнинг магистратура таълим шакли бўйича 2020/2021-ўқув йили учун имтиҳонлар 8–20 сентябрь кунлари бўлиб ўтди. Ушбу ўқув йилида магистратурага 73 минг абитуриент ҳужжат топширган бўлиб, имтиҳон 13 та ҳудуддаги 19 та ОТМда, онлайн шаклда ўтказилган.
2020 йилда Ўзбекистондаги олий таълим муассасаларига магистратурага 10 425 та ўрин ажратилган. Шундан 5475 нафари грант, 4950 нафари тўлов-контракт асосида таҳсил олади. 2020/2021-ўқув йили магистрантлар учун ҳам масофавий шаклда бошланади.
Изоҳ (0)